چیف آف ڈیفنس فورسز فیلڈ مارشل سید عاصم منیر کا کہنا ہے کہ قومی سلامتی پر کوئی سمجھوتہ نہیں کیا جائے گا، جبکہ ملک کی خودمختاری اور علاقائی سالمیت کا تحفظ پاک فوج کی اولین ترجیح ہے۔
لاہور گیریژن میں افسران سے خطاب کرتے ہوئے فیلڈ مارشل سید عاصم منیر نے کہا کہ قومی سلامتی کو لاحق خطرات کے حوالے سے زیرو ٹالرنس پالیسی اپنائی گئی ہے اور پاک فوج ہر قسم کے چیلنجز سے نمٹنے کے لیے پرعزم ہے۔
انہوں نے واضح کیا کہ ملک کی خودمختاری اور علاقائی سالمیت کا تحفظ پاک فوج کی اولین ترجیح ہے۔
فیلڈ مارشل کا کہنا تھا کہ پاکستان کی مسلح افواج خودمختاری، علاقائی سالمیت اور داخلی استحکام کے تحفظ کے لیے ثابت قدم ہیں، جبکہ اعلیٰ معیار، نظم و ضبط اور بے لوث قومی خدمت افواج کی پہچان ہے۔
انہوں نے مزید کہا کہ پاک فوج جدید تقاضوں سے ہم آہنگ ہونے کی بھرپور صلاحیت رکھتی ہے اور جوانوں کی جسمانی فٹنس اور مورال کو ترجیح دی جا رہی ہے۔
آئی ایس پی آر کے مطابق چیف آف ڈیفنس فورسز فیلڈ مارشل سید عاصم منیر نے لاہور گیریژن کا دورہ کیا، جہاں انہیں فارمیشن کی آپریشنل تیاریوں پر تفصیلی بریفنگ دی گئی۔
دورے کے دوران فیلڈ مارشل نے فارمیشن کے زیر اہتمام جاری تربیتی مشقوں کا جائزہ لیا اور مستقبل کی جنگوں کے تقاضوں کے مطابق تیاریوں اور جدید ٹیکنالوجی کے مؤثر استعمال پر زور دیا۔ انہوں نے جوانوں کو فراہم کی گئی کھیلوں اور تفریحی سہولتوں کو سراہا۔
