وزیراعلیٰ خیبرپختونخوا سہیل آفریدی کے لاہور دورے کے دوران پنجاب پولیس نے چکری کے مقام پر قیام و طعام کے لیے مختص ایریا کو سیل کر دیا۔

اس اقدام پر ردعمل دیتے ہوئے وزیراعلیٰ خیبرپختونخوا سہیل آفریدی نے کہا کہ پنجاب حکومت اس قدر خوفزدہ ہے کہ قیام و طعام کا مقررہ ایریا بھی بند کر دیا گیا ہے۔ ان کا کہنا تھا کہ وہ شروع دن سے کہتے آ رہے ہیں کہ موجودہ حکمران عوام کے منتخب نمائندے نہیں ہیں۔

سہیل آفریدی نے کہا کہ قیام و طعام کے مقامات سیل کرنا خوف کی واضح علامت ہے، جبکہ عوامی نمائندوں کا راستہ روکنا دراصل عوام کی آواز دبانے کی کوشش ہے۔ انہوں نے مزید کہا کہ جنہیں عوام کا سامنا کرنے کا حوصلہ نہ ہو وہی سڑکیں اور سہولتیں بند کرتے ہیں۔

وزیراعلیٰ خیبرپختونخوا کے مطابق اقتدار کے سہارے عوامی حقوق سلب کرنا جمہوریت نہیں بلکہ کھلی آمریت ہے۔ انہوں نے کہا کہ عوام جان چکے ہیں کہ خوف زدہ حکمران بند دروازوں کے پیچھے فیصلے کرتے ہیں۔