نیشنل سائبر کرائم انویسٹی گیشن ایجنسی (این سی سی آئی اے) نے صارفین کو واٹس ایپ ہیک ہونے کی صورت میں فوری حفاظتی اقدامات سے آگاہ کر دیا ہے۔

 این سی سی آئی اے کے مطابق اگر کسی صارف کا واٹس ایپ اکاؤنٹ ہیک ہو جائے، رسائی ختم ہو جائے یا یہ شبہ ہو کہ کوئی اور اکاؤنٹ استعمال کر رہا ہے تو فوراً واٹس ایپ کو ان انسٹال کر کے دوبارہ انسٹال کیا جائے اور اکاؤنٹ کو ری رجسٹر کیا جائے۔

حکام کے مطابق لاگ اِن کے لیے فون نمبر درج کرنے پر ایس ایم ایس کے ذریعے موصول ہونے والا 6 ہندسوں کا کوڈ فوری طور پر درج کریں، جس کے بعد ہیکر کے موبائل سے واٹس ایپ خود بخود لاگ آؤٹ ہو جائے گا، کیونکہ ایک وقت میں واٹس ایپ صرف ایک ڈیوائس پر فعال رہتا ہے۔

این سی سی آئی اے کا کہنا ہے کہ اگر ہیکر نے ٹو اسٹیپ ویریفکیشن آن کر دی ہو اور پن معلوم نہ ہو تو واٹس ایپ 7 دن انتظار کا کہہ سکتا ہے، تاہم اس دوران صارف پریشان نہ ہو کیونکہ ایس ایم ایس کوڈ درج ہوتے ہی ہیکر لاگ آؤٹ ہو چکا ہوتا ہے اور کوئی بھی اکاؤنٹ استعمال یا پیغامات نہیں پڑھ سکتا۔

حکام کے مطابق جن صارفین نے پہلے ای میل ایڈریس لنک کیا ہوا ہو وہ “Forgot PIN” کے آپشن کے ذریعے فوری طور پر اپنا پن ری سیٹ کر سکتے ہیں۔