خیبر پختونخوا کے بالائی پہاڑی علاقوں میں 13 سے 15 دسمبر تک بارش اور شدید برفباری کا امکان ہے، جس کے باعث لینڈ سلائیڈنگ، سڑکوں پر پھسلن اور سفری مشکلات بڑھنے کا خدشہ ہے۔

 پی ڈی ایم اے نے تمام متعلقہ اداروں کو پیشگی اقدامات کی ہدایت کرتے ہوئے صوبے بھر میں الرٹ جاری کر دیا ہے۔

پی ڈی ایم اے کے مطابق چترال، دیر، سوات، شانگلہ، کوہستان، مانسہرہ، ایبٹ آباد، گلیات، ہری پور، بونیر، مہمند، خیبر، اورکزئی، کرم اور شمالی و جنوبی وزیرستان میں بارش و برفباری متوقع ہے، جبکہ ناران، کاغان، کلام اور جبوڑی سمیت بالائی علاقوں میں سڑکوں پر برف جمنے سے پھسلن پیدا ہوسکتی ہے۔

پشاور، چارسدہ، مردان، نوشہرہ اور صوابی میں ہلکی بارش کی پیشگوئی کی گئی ہے۔ شدید بارش یا برفباری کے دوران لینڈ سلائیڈنگ کے واقعات کا امکان بھی بڑھ سکتا ہے۔

پی ڈی ایم اے نے شہریوں کو ہدایت کی ہے کہ دھند کے سبب موٹر ویز اور ہائی ویز پر ٹریفک متاثر ہوسکتی ہے، اس لیے سفر انتہائی احتیاط سے کریں۔ میدانی علاقوں میں دھند کی شدت اور حدِ نگاہ کم ہونے کا بھی امکان ہے۔

مزید برآں، متعلقہ اداروں کو نکاسی آب کا نظام فعال رکھنے، جبکہ دریاؤں اور برساتی نالوں کے قریب رہنے والوں کو الرٹ رہنے کی ہدایت دی گئی ہے۔ سیاحوں اور مسافروں کو غیر ضروری سفر سے گریز کی اپیل کی گئی ہے۔