پاکستان کی سماجی کارکن اور کمیونی کیشن پروفیشنل فرشتہ نور نے 2025 Women Changing the World Asia Awards میں رورل اینڈ ریجنل ایریاز امپیکٹ کیٹیگری میں سلور ایوارڈ جیت لیا۔ یہ ایوارڈز ان خواتین کو دیا جاتا ہے جو پائیداری، قیادت، انسانی حقوق، تعلیم، صحت اور سماجی بھلائی کے شعبوں میں نمایاں کردار ادا کر رہی ہوں۔
فرشتہ نور، جو سرحد رورل سپورٹ پروگرام (SRSP) میں کمیونی کیشن آفیسر اور میرر آف دی سوسائٹی کی پروگرام مینجر ہیں، کو یہ اعزاز خواتین کے حقوق، صنفی تشدد (GBV) کے خلاف آگاہی، نوجوانوں کی قیادت اور ذہنی صحت سے متعلق سرگرمیوں پر دیا گیا۔ وہ یہ کام خیبرپختونخوا کے دیہی اور متاثرہ علاقوں میں کر رہی ہیں۔
فرشتہ نور وزیراعظم یوتھ پروگرام کی رکن بھی ہیں اور جامعہ پشاور میں شعبہ صحافت کی طالبہ ہیں۔ وہ میڈیا اور اسٹوری ٹیلنگ کو معاشرتی انصاف کے فروغ کا ذریعہ بناتی ہیں۔
اپنے بیان میں فرشتہ نور نے کہا:
“یہ کام مجھے کمزور اور متاثرہ کمیونٹیز کے ساتھ کھڑے ہونے کا موقع دیتا ہے۔ یہ ایوارڈ میرے لیے حوصلہ افزائی ہے اور اس بات کا ثبوت بھی کہ دیہی اور مشکل علاقوں کی خواتین بھی قیادت کر سکتی ہیں، راستے بنا سکتی ہیں اور تبدیلی لا سکتی ہیں۔”
گزشتہ سال کے دوران فرشتہ نے ملاکنڈ میں GBV آگاہی مہمات کی قیادت کی، نوجوانوں کی لیڈرشپ پلیٹ فارمز کو مضبوط کیا اور دیہی خواتین کی کہانیوں کو قومی و بین الاقوامی سطح تک پہنچایا۔
انہوں نے کہا کہ اصل تبدیلی کی شروعات ہمیشہ نچلی سطح سے ہوتی ہے۔
“ایک مضبوط اور پُرعزم آواز پورے بیانیے کو بدل سکتی ہے۔ اسے کبھی کم نہ سمجھیں۔”
فرشتہ نور اب پاکستان کی نمائندگی 2026 گلوبل ویمن چینجنگ دی ورلڈ ایوارڈز میں کریں گی جو 22 اپریل 2026 کو پیرس میں عالمی سمِٹ کے دوران ہوں گے۔
.jpeg)
.jpeg)
.jpeg)
