خیبرپختونخوا میں تعلیم کے شعبے میں ایک بڑی پیش رفت ہوئی ہے، جہاں صوبائی محکمہ تعلیم نے 16,000 نئے اساتذہ کی تقرری کا عمل مکمل کرتے ہوئے انہیں تقرری آرڈرز جاری کر دیے ہیں۔
اس سلسلے میں منعقدہ مرکزی تقریب میں وزیراعلیٰ محمد سہیل آفریدی نے بطور مہمانِ خصوصی شرکت کی اور منتخب ہونے والے اساتذہ کو مبارکباد پیش کی۔
اپنے خطاب میں وزیراعلیٰ کا کہنا تھا کہ تمام اساتذہ کو مکمل میرٹ اور قابلیت کی بنیاد پر منتخب کیا گیا ہے، اور مختلف سیاسی پس منظر رکھنے والے افراد کی موجودگی اس بات کا ثبوت ہے کہ صوبے میں سفارش کلچر کا خاتمہ ہو چکا ہے۔
انہوں نے یہ بھی کہا کہ عمران خان کے وژن کے مطابق سرکاری نظام میں شفافیت اور میرٹ کو مضبوط بنیاد فراہم کی گئی ہے، اور ان اصولوں کی خلاف ورزی برداشت نہیں کی جائے گی۔
وزیراعلیٰ نے اساتذہ کو معاشرے کا "روحانی والدین" قرار دیتے ہوئے کہا کہ بچوں کا مستقبل انہی کی تربیت پر منحصر ہے، اور یہی نوجوان آگے چل کر ملک و صوبے کی قیادت سنبھالیں گے۔ انہوں نے توقع ظاہر کی کہ نئی بھرتیاں تعلیمی معیار میں نمایاں بہتری لائیں گی۔
تقریب کے دوران وزیراعلیٰ نے ضلع خیبر اور پشاور کے پوزیشن ہولڈر اساتذہ کو تقرری آرڈرز خود بھی حوالے کیے۔ اس بھرتی میں 10,417 مرد اور 5,753 خواتین اساتذہ شامل ہیں، جو صوبے کے تعلیمی نظام میں نئی توانائی کا باعث بنیں گے۔
.jpg)