خیبرپختونخوا میں پہلی بار تمام طبی تشخیصی ٹیسٹوں کے یکساں نرخ مقرر کر دیے گئے ہیں۔ محکمہ صحت کی جانب سے جاری اعلامیے کے مطابق یہ نرخ صوبے کے تمام بنیادی مراکز صحت سے لے کر ضلعی ہیڈکوارٹر ہسپتالوں (ڈی ایچ کیوز) تک نافذ ہوں گے۔
محکمہ صحت نے 63 سے زائد میڈیکل ٹیسٹوں کی تفصیلی فہرست جاری کی ہے جس کے تحت شوگر ٹیسٹ کی قیمت 65 روپے، ایچ بی اے ون سی 300 روپے، کولیسٹرول ٹیسٹ 100 روپے جبکہ ٹی ٹراپونین ٹیسٹ 600 روپے مقرر کئے گئے ہیں۔ اس کے علاوہ پی ایس اے ٹیسٹ کی قیمت 450 روپے اور یورین آر ای ٹیسٹ 50 روپے مقرر کی گئی ہے۔
مراسلے کے مطابق لیبارٹری ٹیسٹوں کے ساتھ ساتھ ریڈیالوجی ٹیسٹوں کی قیمتیں بھی پہلی بار باضابطہ طور پر متعین کی گئی ہیں۔ میڈیکل ٹیسٹوں کے نرخ مقرر کرنے کا یہ فیصلہ صوبائی کابینہ کے 40ویں اجلاس میں کیا گیا تھا۔
محکمہ صحت نے ریٹ فکسنگ کمیٹی کو یہ اختیار بھی دیا ہے کہ وہ سالانہ بنیادوں پر یا ضرورت کے مطابق مقررہ نرخوں کا ازسرنو جائزہ لے سکے، تاکہ صوبے بھر میں تشخیصی ٹیسٹوں کی لاگت میں شفافیت اور یکسانیت برقرار رکھی جاسکے۔
.jpg)
