پنجاب حکومت کی جانب سے خیبر پختونخوا کو آٹے اور گندم کی ترسیل پر پابندی کے معاملے پر پیپلز پارٹی کے رکن صوبائی اسمبلی و پارلیمانی لیڈر احمد کریم کندی نے وفاقی وزیر داخلہ رانا ثناء اللہ کو خط لکھ کر پابندی کو غیر آئینی قرار دیا ہے۔
احمد کریم کندی نے اپنے مؤقف میں کہا کہ بین الصوبائی گندم کی ترسیل پر عائد پابندیاں آئینِ پاکستان کے آرٹیکل 151 سے متصادم ہیں، جس کے تحت صوبوں کے درمیان آزادانہ تجارت وفاقی ضمانت کے تحت آتی ہے۔
انہوں نے واضح کیا کہ خیبر پختونخوا پہلے ہی گندم کی قلت کا شکار ہے اور ترسیل میں رکاوٹ کے باعث صوبے میں آٹے کی قیمتوں میں اضافہ اور عوامی مشکلات بڑھنے کا خدشہ ہے۔
پیپلز پارٹی رہنما نے وفاقی وزیر سے مطالبہ کیا کہ وہ اس معاملے پر فوری نوٹس لے کر پنجاب حکومت کو پابندیاں ختم کرنے کی ہدایت کریں۔
انہوں نے یہ بھی ہدایت کی کہ خط کی نقول متعلقہ حکام کو ارسال کی جائیں تاکہ مسئلے کے حل میں پیش رفت ممکن ہو۔
واضح رہے کہ گزشتہ روز وزیرِ اعلیٰ خیبر پختونخوا محمد سہیل آفریدی کی ہدایت پر محکمہ خوراک نے پنجاب حکومت کو باضابطہ خط ارسال کیا تھا، جس میں گندم اور آٹے کی بین الصوبائی ترسیل پر پابندیوں کے خاتمے کا مطالبہ کیا گیا۔
محکمہ خوراک کے مطابق پنجاب کی جانب سے گندم روکنے کا عمل وفاقی اکائیوں کے درمیان ہم آہنگی کے اصولوں کے منافی ہے، اور اس سے خیبرپختونخوا میں آٹے کی فراہمی بری طرح متاثر ہو رہی ہے۔
.jpeg)