صوبائی ڈیزاسٹر مینجمنٹ اتھارٹی (پی ڈی ایم اے) نے خیبرپختونخوا کے مختلف اضلاع میں 2 اکتوبر سے 7 اکتوبر تک بارشوں اور آندھی طوفان کی پیشگوئی کے بعد ضلعی انتظامیہ کو الرٹ جاری کر دیا ہے۔محکمہ موسمیات کے مطابق اس دوران مختلف اضلاع میں وقفے وقفے سے بارش، گرج چمک اور تیز ہواؤں کا امکان ہے، جبکہ بعض مقامات پر موسلادھار بارشوں کی پیشگوئی بھی کی گئی ہے۔
دیر اپر و لوئر، چترال اپر و لوئر، سوات، کوہستان اپر و لوئر، کولائی پالس، شانگلہ، بٹگرام، مانسہرہ، ایبٹ آباد، ہری پور، بونیر، ملاکنڈ، باجوڑ اور مہمند میں گرج چمک کے ساتھ موسلادھار بارش کا امکان ظاہر کیا گیا ہے۔اسی طرح کوہاٹ، پشاور، چارسدہ، نوشہرہ، مردان، صوابی، خیبر، اورکزئی، کرم، ہنگو، کرک، بنوں، لکی مروت، شمالی و جنوبی وزیرستان، ٹانک اور ڈیرہ اسماعیل خان کے اضلاع میں بھی تیز بارش اور آندھی متوقع ہے۔
موسلادھار بارش کے نتیجے میں دیر، چترال، سوات، شانگلہ، بونیر، کوہستان، مانسہرہ، ایبٹ آباد، چارسدہ، نوشہرہ، صوابی اور مردان میں ندی نالوں اور چشموں میں طغیانی کا خدشہ ہے۔مزید برآں، ایبٹ آباد، بٹگرام، بونیر، خیبر، ملاکنڈ، مہمند، اورکزئی، تورغر، شمالی وزیرستان اور دیگر پہاڑی اضلاع میں لینڈ سلائیڈنگ کے باعث سڑکوں کی بندش کا امکان بھی ظاہر کیا گیا ہے۔
پی ڈی ایم اے کے مطابق تیز ہواؤں کے باعث کمزور مکانات، بجلی کے کھمبوں، اشتہاری بورڈز اور سولر پینلز کو نقصان پہنچنے کا خطرہ موجود ہے۔پی ڈی ایم اے نے تمام ضلعی انتظامیہ کو نکاسی آب کے نظام کی صفائی، متاثرہ علاقوں میں بروقت آگاہی مہم چلانے اور ایمرجنسی سروسز کی فراہمی یقینی بنانے کی ہدایت کی ہے۔
کاشتکاروں اور مال مویشی پالنے والوں کو اپنی فصلیں اور جانور محفوظ مقامات پر منتقل کرنے جبکہ عوام اور سیاحوں کو خراب موسم کے دوران غیر ضروری سفر سے اجتناب کرنے کا مشورہ دیا گیا ہے۔
.jpeg)
