لوئر دیر کے علاقے میدان، سر بانڈہ میں سرچ اینڈ اسٹرائیک آپریشن کے دوران سیکیورٹی فورسز اور شدت پسندوں کے مابین شدید جھڑپ میں کم ازکم 7 ایف سی اہلکار شہید جبکہ 13 زخمی ہوگئے۔ سرکاری ذرائع کے مطابق ایک اہلکار لاپتا بھی ہے۔ شدت پسندوں نے مورچے بنا کر قافلے پر فائرنگ کی، زخمیوں کو پہلے لال قلعہ ہسپتال اور بعد ازاں تیمرگرہ ڈسٹرکٹ ہیڈکوارٹرز منتقل کیا گیا۔
پولیس، ایلیٹ فورس اور دیر اسکاؤٹس کی بھاری نفری علاقے میں موجود رہی اور آپریشن جاری ہے۔ سیکیورٹی فورسز نے دعویٰ کیا کہ شدت پسندوں کو بھاری نقصان پہنچایا گیا ہے، تاہم تفصیلات تاحال سامنے نہیں آئیں۔ رات گئے شدت پسندوں نے لجبوک پولیس پوسٹ پر بھی حملہ کیا لیکن اہلکاروں نے حملہ پسپا کردیا۔
ضلعی انتظامیہ نے لوئر دیر میں دفعہ 144 نافذ کرتے ہوئے ڈرونز، کواڈ کاپٹرز اور غبارے اُڑانے پر پابندی لگا دی ہے۔ ڈپٹی کمشنر محمد عارف خان نے خلاف ورزی پر سخت قانونی کارروائی کی ہدایت دی۔
ادھر جنوبی وزیرستان میں توجی خیل قبیلے کے مشران نے جرگے میں فیصلہ کیا کہ اپنی زمین دہشت گردوں کے لیے استعمال نہیں ہونے دیں گے۔ انہوں نے شدت پسندوں کو خبردار کیا کہ یا تو علاقے سے نکل جائیں یا جلاوطنی کے لیے تیار رہیں۔
جرگے کے مطابق دہشت گردوں کو پناہ یا مدد فراہم کرنے والے کے مکان مسمار اور 20 لاکھ روپے جرمانہ کیا جائے گا۔
.jpeg)