وزیر دفاع خواجہ آصف نے فتنہ الخوارج کے دہشت گردوں کی فائرنگ میں شہید ہونے والے میجر عدنان اسلم کو خراج عقیدت پیش کرتے ہوئے کہا ہے کہ پاک فوج نے ایک اور بہادر بیٹے کو وطن پر قربان کر دیا۔
انہوں نے بتایا کہ ہلاک ہونے والے پانچ دہشت گردوں میں سے تین افغان جبکہ دو کا تعلق کالعدم ٹی ٹی پی سے تھا۔ ان کا کہنا تھا کہ افغان شہری پاکستان میں روزگار کما رہے ہیں جبکہ انہی کی سرزمین سے دہشت گرد ہمارے بچوں کا خون بہانے آتے ہیں۔
خواجہ آصف نے کہا کہ پاکستان نے افغان عوام کے لیے دو طویل جنگیں لڑیں، امن اور معیشت قربان کی، لاکھوں شہادتیں دیں اور آج بھی 60 سے 70 لاکھ افغان شہری یہاں موجود ہیں، جن میں بڑے ٹرانسپورٹر اور ٹھیکیدار بھی شامل ہیں۔
وزیر دفاع نے افغانوں کی طرف سے دہشت گردی کو تاریخ کی بدترین محسن کشی قرار دیتے ہوئے کہا کہ دنیا کی تاریخ میں اس جیسی مثال نہیں ملتی۔
