عبدالقیوم آفریدی
خیبر پختونخوا حکومت نے ضم شدہ قبائلی اضلاع کے دیہی علاقوں میں صفائی ستھرائی کے لیے 34 کروڑ 21 لاکھ روپے کے فنڈز کی منظوری دے دی۔ اس حوالے سے محکمہ خزانہ نے نوٹیفکیشن جاری کردیا ہے۔
نوٹیفکیشن کے مطابق فنڈز سے مشینری اور صفائی کے آلات خریدے جائیں گے، جبکہ عملے کی تنخواہیں مشینری کی حوالگی کے بعد جاری ہوں گی۔ تین ماہ کے لیے آپریشنل فنڈز فراہم کئے جائیں گے اور کارکردگی کی بنیاد پر مزید فنڈز جاری ہوں گے۔
تفصیلات کے مطابق ضلع باجوڑ کے لیے 72.76 ملین، خیبر کے لیے 76.6 ملین، کرم کے لیے 38.02 ملین، مہمند کے لیے 35.03 ملین، شمالی وزیرستان کے لیے 43.3 ملین، اورکزئی کے لیے 23.66 ملین جبکہ جنوبی وزیرستان کے لیے 52.75 ملین روپے جاری کئے گئے ہیں۔
ذرائع کے مطابق ویلج کونسل سطح پر صفائی کے لیے عارضی بنیادوں پر عملہ بھرتی کیا جائے گا، جس میں ایک لوڈر رکشہ ڈرائیور اور تین صفائی ورکر شامل ہوں گے۔ یہ عملہ روزانہ اجرت کی بنیاد پر تنخواہ لے گا۔
علاقہ مکینوں نے حکومت کے اقدام کو خوش آئند قرار دیا ہے۔ ضلع خیبر کے شیراز خان کا کہنا تھا کہ اس منصوبے سے علاقے صاف ستھرے ہوں گے اور بیماریوں سے بھی بچاؤ ممکن ہوگا۔ انہوں نے امید ظاہر کی کہ اگر حکومت اس نظام کو مستقل بنیادوں پر قائم رکھے تو ضم شدہ اضلاع میں ایک مثبت تبدیلی آئے گی۔
.jpeg)
