محکمہ موسمیات نے آئندہ چند روز کے دوران ملک کے بیشتر حصوں میں موسلادھار بارشوں کی پیش گوئی کی ہے جبکہ بالائی علاقوں میں لینڈ سلائیڈنگ اور کراچی سمیت دیگر شہری علاقوں میں اربن فلڈنگ کے خدشے کا کہا گیا ہے۔
خیبرپختونخوا میں 29 سے 31 اگست کے دوران شدید بارشوں کا امکان ہے، جس سے ملاکنڈ اور ہزارہ ڈویژن کے پہاڑی علاقوں میں لینڈ سلائیڈنگ کا خطرہ ہے۔ آزاد کشمیر کے اضلاع مظفرآباد، باغ، حویلی، کوٹلی، میرپور اور بھمبر میں آج سے 2 ستمبر تک موسلادھار بارشوں کا سلسلہ جاری رہے گا جبکہ گلگت بلتستان میں بھی بارشوں کے ساتھ لینڈ سلائیڈنگ کا خدشہ ظاہر کیا گیا ہے۔
وفاقی دارالحکومت اسلام آباد اور راولپنڈی میں بھی آج سے 2 ستمبر کے دوران گرج چمک کے ساتھ موسلا دھار بارشیں برسنے کا امکان ہے۔ اسی طرح وسطی و جنوبی پنجاب میں 29 سے 31 اگست کے دوران بارشوں کی پیش گوئی کی گئی ہے۔
جن میں ملتان، ڈیرہ غازی خان، راجن پور، لیہ، بھکر، ساہیوال، بہاولپور، بہاولنگر اور رحیم یار خان شامل ہیں۔ شمالی و شمال مشرقی پنجاب کے اضلاع اٹک، جہلم، چکوال، لاہور، گوجرانوالہ، سیالکوٹ، گجرات، نارووال، حافظ آباد اور منڈی بہاؤالدین میں 30 اور 31 اگست کو شدید بارشوں کا امکان ہے۔
دوسری جانب نیشنل ڈیزاسٹر منیجمنٹ اتھارٹی (این ڈی ایم اے) نے کراچی میں کل سے بارشوں کا امکان ظاہر کرتے ہوئے خبردار کیا ہے کہ ممکنہ بارشوں کے باعث شہر میں اربن فلڈنگ کا خدشہ ہے۔ سندھ کے دیگر اضلاع میں بھی بارشوں کا سلسلہ متوقع ہے جن میں ٹھٹہ، سجاول، بدین اور تھرپارکر 30 اگست سے 2 ستمبر تک جبکہ حیدرآباد، دادو، سکھر، گھوٹکی، لاڑکانہ، جیکب آباد اور کشمور 30 اگست سے یکم ستمبر تک شامل ہیں۔
