خیبرپختونخوا حکومت نے ڈیرہ اسماعیل خان کو دو اضلاع میں تقسیم کرنے کی تیاری شروع کر دی ہے۔ وزیراعلیٰ علی امین گنڈا پور کے آبائی علاقے پہاڑپور کو نئے ضلع کا درجہ دینے کے لیے فزیبلٹی رپورٹ تیار کی جا رہی ہے۔
ذرائع کے مطابق کمشنر اور ڈپٹی کمشنر ڈیرہ اسماعیل خان کو ہدایت کی گئی ہے کہ تین دن کے اندر نئے ضلع پہاڑپور کے قیام سے متعلق رپورٹ حکومت کو ارسال کریں۔ اس رپورٹ میں ضلع کا صدر مقام، جغرافیائی حدود، آبادی، تحصیلوں، نیبرہڈ اور ویلج کونسلز، اور پٹوار حلقوں کی تفصیل شامل ہوگی۔
مزید برآں، مالی اور انتظامی تقسیم سے متعلق سفارشات بھی تیار کی جا رہی ہیں تاکہ نئے ضلع کے قیام کو ایک مؤثر نظامِ حکومت کے تحت یقینی بنایا جا سکے۔
یاد رہے کہ وزیراعلیٰ علی امین گنڈا پور نے 14 اگست کو ڈیرہ اسماعیل خان کے دورے کے دوران عوام سے خطاب میں پہاڑپور کو ضلع بنانے کا اعلان کیا تھا، جس پر اب عملی پیش رفت کا آغاز کر دیا گیا ہے۔
حکومتی ذرائع کے مطابق پہاڑپور کو ضلع کا درجہ دینے سے مقامی سطح پر انتظامی سہولتوں میں بہتری آئے گی اور ترقیاتی منصوبوں پر تیزی سے عمل درآمد ممکن ہوگا۔ عوامی حلقوں نے اس فیصلے کو خوش آئند قرار دیا ہے۔
