خیبرپختونخوا میں حالیہ سیلاب نے تعلیمی نظام کو شدید نقصان پہنچایا ہے، صوبے بھر میں 61 اسکول مکمل جبکہ 324 اسکول جزوی طور پر تباہ ہو گئے ہیں۔
محکمہ ابتدائی و ثانوی تعلیم کی تازہ رپورٹ کے مطابق مکمل تباہ ہونے والے اسکولوں میں 52 پرائمری، 7 مڈل اور 2 ہائی اسکول شامل ہیں، جب کہ جزوی طور پر متاثرہ اسکولوں میں 233 پرائمری، 35 مڈل، 42 ہائی اور 14 ہائر سیکنڈری اسکول شامل ہیں۔
رپورٹ میں بتایا گیا ہے کہ سب سے زیادہ نقصان ضلع سوات میں ہوا، جہاں 91 اسکول مکمل طور پر تباہ اور 30 اسکول جزوی طور پر متاثر ہوئے۔ شانگلہ میں 11 اسکول مکمل اور 50 جزوی طور پر تباہ ہوئے، ہری پور میں 7 اسکول مکمل اور 29 جزوی متاثر ہوئے جبکہ دیر لوئر میں 17 اسکول مکمل طور پر تباہ ہو گئے۔
اسی طرح ایبٹ آباد میں 3 اسکول مکمل اور 67 جزوی طور پر متاثر ہوئے۔ بونیر میں 4 اسکول مکمل تباہ اور 14 کو نقصان پہنچا، جب کہ بٹگرام میں 9 اسکول مکمل اور 6 اسکول جزوی طور پر متاثر ہوئے۔
سیلاب کے دوران تدریسی عملے کی جانی نقصان کی بھی اطلاع ملی ہے۔ رپورٹ کے مطابق تدریسی عملے کے 4 اور غیر تدریسی عملے کے 2 افراد جاں بحق جبکہ 3 اساتذہ زخمی ہوئے۔ طلبہ میں بھی 2 اموات اور 2 زخمی ہونے کے واقعات رپورٹ ہوئے ہیں۔
حکام کا کہنا ہے کہ متاثرہ اسکولوں کی بحالی کے لیے اقدامات شروع کر دیے گئے ہیں اور جلد ہی بحالی کا عمل تیز کیا جائے گا۔
