خیبرپختونخوا کے مختلف اضلاع میں وقفے وقفے سے بارشوں کے باعث گلیشیائی علاقوں میں جھیلیں پھٹنے کے واقعات کا خطرہ بڑھ گیا ہے۔ صوبائی ڈیزاسٹر منیجمنٹ اتھارٹی (پی ڈی ایم اے) نے چترال اپر، چترال لوئر، دیر، سوات اور کوہستان اپر کے عوام کو ممکنہ خطرات کے پیش نظر الرٹ رہنے کی ہدایت جاری کر دی ہے۔
پی ڈی ایم اے کے مطابق حالیہ اور آئندہ تیز بارشوں کے باعث مذکورہ علاقوں میں گلیشیائی جھیلوں کے پھٹنے (GLOF) کے واقعات، لینڈ سلائیڈنگ، اور مقامی ندی نالوں میں طغیانی کا خدشہ ہے۔ ضلعی انتظامیہ کو حساس علاقوں کی مسلسل نگرانی، بروقت وارننگ کے اجرا، اور انخلاء کی مشقیں یقینی بنانے کی ہدایت دی گئی ہے۔
ادارے نے ندی نالوں کے قریب غیر ضروری نقل و حرکت سے گریز، اور گاڑیوں کو تیز بہاؤ والے پانی میں لے جانے سے اجتناب کرنے کی سخت تاکید کی ہے۔ پی ڈی ایم اے کے مطابق ممکنہ متاثرہ علاقوں میں انخلا کے مقامات کو تیار کر لیا گیا ہے جبکہ ہنگامی سامان اور ریسکیو سروسز کو بھی الرٹ کر دیا گیا ہے۔
سیاحوں کو بھی احتیاطی تدابیر اختیار کرنے اور مقامی انتظامیہ سے رابطے میں رہنے کی ہدایت کی گئی ہے۔ سڑکوں کی ممکنہ بندش یا متاثر ہونے کی صورت میں بروقت بحالی کے لیے این ایچ اے، ایف ڈبلیو او اور سی اینڈ ڈبلیو کو متحرک کر دیا گیا ہے۔
پی ڈی ایم اے نے ضلعی انتظامیہ کو ہدایت کی ہے کہ کسی بھی ممکنہ خطرے کے پیش نظر ہنگامی اقدامات کیے جائیں اور عوام میں آگاہی مہم کے ذریعے احتیاطی تدابیر سے متعلق معلومات فراہم کی جائیں۔
ادارے کے مطابق ایمرجنسی آپریشن سنٹر مکمل طور پر فعال ہے اور عوام کسی بھی ناخوشگوار واقعے کی اطلاع یا معلومات کے لیے ہیلپ لائن 1700 پر رابطہ کر سکتے ہیں
