امریکی صدر نے پاکستان سے تجارتی معاہدہ کرنے کا اعلان کر دیا

امریکی صدر ڈونلڈ ٹرمپ نے پاکستان کے ساتھ تجارتی معاہدے کا اعلان کرتے ہوئے کہا ہے کہ امریکا اور پاکستان مل کر تیل کے شعبے کو ترقی دیں گے۔ اپنے سوشل میڈیا پلیٹ فارم ’ٹروتھ سوشل‘ پر جاری بیان میں ٹرمپ نے بتایا کہ وہ اس وقت وائٹ ہاؤس میں مختلف ممالک کے ساتھ تجارتی معاہدوں پر کام میں مصروف ہیں۔

انہوں نے کہا کہ پاکستان کے ساتھ ایک معاہدہ طے پا چکا ہے جس کے تحت دونوں ممالک پاکستان میں موجود تیل کے وسیع ذخائر کو ترقی دیں گے۔ ٹرمپ نے واضح کیا کہ اس منصوبے کی قیادت کے لیے ایک امریکی آئل کمپنی کے انتخاب کا عمل جاری ہے۔

صدر ٹرمپ نے جنوبی کوریا کے ساتھ تجارتی ٹیرف پر بات کرتے ہوئے بھارت کو طنز کا نشانہ بھی بنایا۔ انہوں نے کہا کہ "کون جانتا ہے"، شاید ایک دن پاکستانی بھارت کو تیل فروخت کر رہے ہوں۔

ٹرمپ نے دعویٰ کیا کہ دیگر ممالک بھی ٹیرف میں کمی کی پیشکش کر رہے ہیں تاکہ امریکا کے تجارتی خسارے میں کمی لائی جا سکے۔ انہوں نے کہا کہ ان اقدامات سے امریکا کا تجارتی توازن بہتر ہوگا اور جلد اس حوالے سے مکمل رپورٹ جاری کی جائے گی۔