خولہ زرافشاں

 

پرانے زمانے کی شادیاں سادہ ضرور ہوتی تھیں، مگر اس سادگی میں جو محبت، خلوص اور خوشی تھی، وہ آج کی چمک دمک والی شادیوں میں کم ہی نظر آتی ہے۔

 

نہ بڑے بڑے شادی ہال ہوتے تھے، نہ دکھاوے کی رسمیں۔ گھر کا کھلا صحن ہی شادی کی تقریب کا مرکز ہوتا تھا۔ اسی صحن میں چارپائیاں بچھائی جاتیں، رنگ برنگے کپڑوں سے سجاوٹ کی جاتی اور پورا محلہ ایک خاندان کی طرح خوشیوں میں شریک ہوتا۔

مہمان نوازی کے لیے باہر سے کسی کو بلانے کی ضرورت نہیں پڑتی تھی۔ رشتہ دار خواتین ہی سب کچھ سنبھال لیتیں۔ کوئی کھانا پکاتی، کوئی مہمانوں کو چائے پیش کرتی اور کوئی دلہن کو تیار کرنے میں مصروف ہوتی۔ ہر ہاتھ کام میں لگا ہوتا اور ہر دل خوشی سے بھرا ہوتا۔ اس زمانے میں دعائیں ہی سب سے بڑا تحفہ سمجھی جاتی تھیں۔

شادی کی تقریبات صرف ایک دن تک محدود نہیں ہوتی تھیں بلکہ کئی دن پہلے سے شروع ہوجاتی تھیں۔ دور دراز کے رشتہ داروں کو محبت سے دعوت دی جاتی۔ کوئی پیدل آتا، کوئی تانگے پر اور کوئی گاڑی کے ذریعے سفر کرکے پہنچتا۔

 

مہمانوں کی آمد سے گھر میں رونق لگ جاتی۔ شام ہوتے ہی ڈھولک بجتی اور خواتین روایتی گیت گاتیں۔ ان گیتوں کے لیے نہ کسی اسٹیج کی ضرورت ہوتی تھی، نہ مائیک کی، کیونکہ یہ آوازیں اپنائیت اور خوشی سے بھری ہوتی تھیں۔ بچے صحن میں کھیلتے، بڑے ایک دوسرے کا حال احوال پوچھتے اور یوں محسوس ہوتا جیسے پورا گاؤں ایک ہی گھر ہو۔

 

شادی کی رسمیں سادہ ہونے کے باوجود محبت اور اپنائیت سے بھرپور ہوتی تھیں۔ ہر رسم میں بڑوں کا احترام، چھوٹوں کا پیار اور رشتوں کی مٹھاس جھلکتی تھی۔

ان تقریبات کی سب سے جذباتی رسم دلہن کو ڈولی میں بٹھا کر رخصت کرنا ہوتی تھی۔ دلہن کو پیار سے ڈولی میں بٹھایا جاتا اور بارات اس کے پیچھے چلتی۔ آگے ڈھول کی تھاپ ہوتی، جبکہ باراتی خوشی کے گیت گاتے۔ اس موقع پر دکھاوے سے زیادہ دعاؤں اور خلوص کو اہمیت دی جاتی تھی۔

دوسری طرف دلہن کے گھر والے اسے دعاؤں اور آنسوؤں کے ساتھ رخصت کرتے۔ یہ صرف ایک رسم نہیں بلکہ خاندان کے لیے جذباتی لمحہ ہوتا تھا۔ ماں کی دعا، باپ کی شفقت، بہنوں کے آنسو اور بھائیوں کی خاموش محبت رخصتی کے اس لمحے کو یادگار بنا دیتے تھے۔

 

وقت کے ساتھ ڈولی کی جگہ گاڑیوں نے لے لی اور شادیوں کے انداز بھی بدل گئے۔ اب بیشتر تقریبات شادی ہالوں میں منعقد ہوتی ہیں، جہاں مہمان چند گھنٹے شریک ہوکر اپنے گھروں کو لوٹ جاتے ہیں۔ بعض خاندان محدود مہمانوں کو دعوت دیتے ہیں، جبکہ کئی روایتی رسمیں بھی کم ہوتی جارہی ہیں۔

آج شادیوں میں روشنیاں، سجاوٹ اور مختلف انتظامات تو بہت ہیں، مگر ماضی کی اجتماعی خوشیوں اور محلے کی شراکت کا انداز بدل چکا ہے۔ کئی نئی رسمیں بھی متعارف ہوئی ہیں، جس سے شادیوں کے  اخراجات بڑھتے ہیں۔

 

شاید پرانی رسمیں خود ختم نہیں ہوئیں بلکہ وقت، بدلتے حالات اور ہماری ترجیحات نے انہیں پیچھے چھوڑ دیا ہے۔ سادگی کو پرانا اور دکھاوے کو ضروری سمجھنے کے بجائے اگر ہم شادیوں میں خلوص، باہمی تعاون اور اپنائیت کو دوبارہ اہمیت دیں تو یہ تقریبات کم خرچ ہونے کے ساتھ زیادہ یادگار بھی بن سکتی ہیں۔

 

شادی صرف ایک تقریب نہیں بلکہ دو خاندانوں کے تعلق کا آغاز ہے۔ اگر اس موقع پر سادگی، محبت، بزرگوں کی دعاؤں اور رشتوں کی اہمیت کو برقرار رکھا جائے تو خوشیوں کا اصل رنگ بھی قائم رہ سکتا ہے۔