روزانہ چہل قدمی صحت مند زندگی گزارنے کا ایک آسان اور مؤثر ذریعہ ہے۔ طبی تحقیق کے مطابق باقاعدگی سے پیدل چلنے سے دل کی صحت بہتر بنانے، بلند فشارِ خون اور ذیابیطس ٹائپ ٹو کے خطرات کم کرنے میں مدد ملتی ہے۔ اس کے علاوہ جسمانی سرگرمی ذہنی دباؤ میں کمی، بہتر نیند اور دماغی صحت کے لیے بھی مفید ثابت ہوتی ہے۔

امریکی ادارے سینٹرز فار ڈیزیز کنٹرول اینڈ پریوینشن (CDC) کے مطابق جسمانی سرگرمی بلڈ پریشر کم کرنے، نیند کے معیار کو بہتر بنانے اور دل کی بیماریوں، فالج اور ذیابیطس کے خطرات گھٹانے میں اہم کردار ادا کرتی ہے۔ اسی طرح امریکن ہارٹ ایسوسی ایشن کے مطابق پیدل چلنا دل کی بیماریوں کے امکانات کم کرنے اور مجموعی صحت بہتر بنانے میں مددگار ہے۔

عالمی ادارۂ صحت  کے  مطابق   بالغ افراد کو ہفتے میں 150 سے 300 منٹ تک معتدل جسمانی سرگرمی، جس میں تیز رفتار چہل قدمی بھی شامل ہے، کرنے کی سفارش کرتا ہے۔ ماہرین کے مطابق جسمانی سرگرمی کے لیے کسی مشکل معمول کی ضرورت نہیں، بلکہ روزمرہ زندگی میں پیدل چلنے کو شامل کرنا بھی صحت کے لیے فائدہ مند ہے۔ تاہم اپنی عمر، جسمانی صلاحیت اور صحت کی کیفیت کے مطابق سرگرمی کا انتخاب کرنا ضروری ہے۔