خیبر پختونخوا کے قبائلی اضلاع اور مالاکنڈ ڈویژن میں نان کسٹم پیڈ گاڑیوں کو قانونی اور انتظامی دائرے میں لانے کیلئے اقدامات تیز کر دیے گئے ہیں۔ صوبائی حکومت نے پہلی مرتبہ نان کسٹم پیڈ گاڑیوں کی مؤثر نگرانی اور ضابطہ کاری کے لیے باقاعدہ پالیسی پر عملدرآمد شروع کر دیا ہے۔
محکمہ ایکسائز اینڈ ٹیکسیشن خیبر پختونخوا کے مطابق ملاکنڈ ڈویژن، خیبر، مہمند، باجوڑ، کرم اور شمالی و جنوبی وزیرستان سمیت تمام قبائلی اضلاع میں نان کسٹم پیڈ گاڑیوں پر ایم ٹیگ لگانے کا فیصلہ کیا گیا ہے، جبکہ ان گاڑیوں کے لیے ریڈی ایبل نمبر پلیٹس بھی جاری کی جائیں گی۔
محکمہ ایکسائز کا کہنا ہے کہ قبائلی اضلاع میں موجود تقریباً ڈھائی لاکھ نان کسٹم پیڈ گاڑیوں کی پروفائلنگ مکمل کر لی گئی ہے۔ حکام کے مطابق ایم ٹیگ نہ ہونے کی صورت میں متعلقہ نان کسٹم پیڈ گاڑی کو حکومتی تحویل میں لیا جائے گا۔
حکام کے مطابق نان کسٹم پیڈ گاڑیوں کی نقل و حرکت قبائلی اضلاع تک محدود ہوگی اور انہیں صوبے کے دیگر علاقوں میں چلانے کی اجازت نہیں دی جائے گی۔ واضح رہے کہ اس سے قبل نان کسٹم پیڈ گاڑیوں کے لیے کوئی جامع لائحہ عمل موجود نہیں تھا
