خیبرپختونخوا میں آج سے 5 دسمبر تک مختلف علاقوں میں وقفے وقفے سے بارشوں اور بالائی علاقوں میں برفباری کا امکان ظاہر کیا گیا ہے۔ صوبائی ڈیزاسٹر مینجمنٹ اتھارٹی (پی ڈی ایم اے) نے اس سلسلے میں تمام ضلعی انتظامیہ کو پیشگی حفاظتی اقدامات یقینی بنانے کی ہدایت کر دی ہے۔
پی ڈی ایم اے کے مراسلے کے مطابق 4 سے 5 دسمبر کے دوران دیر اپر و لوئر، چترال اپر و لوئر، سوات، کوہستان اپر و لوئر، کولائی پالس، شانگلہ، بٹگرام، مانسہرہ، ایبٹ آباد، ہری پور، بونیر، ملاکنڈ، باجوڑ اور مہمند میں گرج چمک کے ساتھ بارش اور پہاڑوں پر برفباری کا امکان ہے۔
اسی طرح کوہاٹ، پشاور، چارسدہ، نوشہرہ، مردان، صوابی، خیبر، اورکزئی، کرم، ہنگو، کرک، بنوں، لکی مروت، شمالی و جنوبی وزیرستان، ٹانک اور ڈیرہ اسماعیل خان میں بھی بارش کی پیشگوئی کی گئی ہے۔
مراسلے کے مطابق بارش کے باعث ایبٹ آباد، بٹگرام، بونیر، چترال، دیر، خیبر، کوہستان، کولائی پالس، کرم، ملاکنڈ، مانسہرہ، مہمند، اورکزئی، شانگلہ، سوات، تورغر اور شمالی وزیرستان کے پہاڑی علاقوں میں سڑکوں پر پھسلن کا خدشہ ہے۔ کمزور مکانات، بجلی کے کھمبے، اشتہاری بورڈز اور سولر پینلز کو بھی نقصان پہنچنے کا امکان ظاہر کیا گیا ہے۔
پی ڈی ایم اے نے ضلعی انتظامیہ کو نکاسی آب کے نظام کی صفائی، عوام اور مسافروں کو بروقت آگاہی فراہم کرنے اور تمام متعلقہ اداروں کو ایمرجنسی سروسز، طبی امداد اور ضروری اشیا کی دستیابی یقینی بنانے کی ہدایت کی ہے۔
کاشتکاروں اور مال مویشی پال حضرات کو فصلوں اور جانوروں کو محفوظ مقامات پر منتقل کرنے کا مشورہ دیا گیا ہے جبکہ عوام کو خراب موسم کے دوران غیر ضروری سفر سے گریز کرنے کی اپیل کی گئی ہے۔
پی ڈی ایم اے کے مطابق ایمرجنسی آپریشن سنٹر مکمل طور پر فعال ہے اور شہری کسی بھی ہنگامی صورتحال میں ہیلپ لائن 1700 پر رابطہ کر سکتے ہیں۔
