افغانستان کی عبوری طالبان حکومت نے اسلام آباد کے جی الیون کچہری کے باہر خودکش دھماکے اور وانا کیڈٹ کالج پر دہشتگرد حملے کی مذمت کرتے ہوئے دونوں واقعات کو افسوسناک قرار دیا ہے۔
ذرائع کے مطابق افغان وزارت خارجہ کی جانب سے جاری بیان میں کہا گیا ہے کہ اسلام آباد میں دھماکا اور وانا میں تعلیمی مرکز پر حملہ قابل افسوس اور قابل مذمت ہے۔ بیان میں مزید کہا گیا ہے کہ ان دہشتگرد کارروائیوں میں قیمتی جانوں کے ضیاع پر گہرا دکھ ہے، جب کہ زخمیوں کی جلد صحتیابی کے لیے دعا کی گئی ہے۔
واضح رہے کہ گزشتہ روز اسلام آباد کے جی الیون کچہری کے باہر ہونے والے خودکش دھماکے میں 12 افراد شہید اور 30 زخمی ہوئے، جب کہ دو روز قبل وانا میں کیڈٹ کالج پر فتنہ الخوارج کے دہشتگردوں نے حملہ کیا تھا، جسے سیکیورٹی فورسز نے بروقت کارروائی کرتے ہوئے مکمل طور پر ناکام بنا دیا اور تمام چار دہشتگردوں کو ہلاک کر دیا۔
سیکیورٹی ذرائع کے مطابق وانا کیڈٹ کالج پر حملہ کرنے والے دہشتگرد افغانستان سے رابطے میں تھے۔ وزیر اطلاعات عطا تارڑ نے کہا ہے کہ اسلام آباد دھماکے اور وانا حملے کی تحقیقات کے ٹھوس شواہد جمع کر لیے گئے ہیں، جنہیں بین الاقوامی فورمز پر پیش کیا جائے گا۔
.jpeg)
.jpeg)
.jpeg)
