خیبر پختونخوا کمیشن برائے حیثیت نسواں نے "خیبر امن جرگہ" میں خواتین کی شمولیت کی سفارش کرتے ہوئے کہا ہے کہ امن اور پالیسی سازی کے مکالموں میں خواتین کی نمائندگی نہایت ضروری ہے۔
کمیشن کے مطابق خواتین کی شرکت آئین پاکستان کے آرٹیکل 25(2) کے تحت لازم ہے، جبکہ خواتین کے اختیارات کے قانون 2016 کی شق 6(b) پر عمل درآمد بھی ناگزیر ہے۔
اعلان کے مطابق "خیبر امن جرگہ" 25 اکتوبر کو ضلع خیبر، باڑہ میں منعقد ہوگا جس کی صدارت وزیراعلیٰ خیبر پختونخوا کریں گے۔
کمیشن نے کہا کہ پاکستان اقوامِ متحدہ کی قرارداد 1325 پر عمل درآمد کا پابند ہے، جس کے تحت خواتین کی آواز کو امن اور فیصلہ سازی کے فورمز میں شامل کرنا ضروری ہے۔
کمیشن نے چیف سیکریٹری، ضلعی انتظامیہ اور متعلقہ اداروں سے کہا ہے کہ وہ خواتین کی نمائندگی کو یقینی بنائیں اور سول سوسائٹی کی خواتین کو بھی جرگہ میں شمولیت دی جائے تاکہ پائیدار امن کے لیے جامع مکالمہ ممکن ہو۔
.jpeg)