پاکستان کی معیشت کو حالیہ تباہ کن سیلابوں کے نتیجے میں 822 ارب روپے کے بھاری نقصانات برداشت کرنا پڑے، جن سے ملک کے 70 اضلاع میں 65 لاکھ سے زائد افراد متاثر ہوئے ہیں۔
منصوبہ بندی اور اقتصادی امور ڈویژن کے سرکاری دستاویزات کے مطابق، سیلاب سے سب سے زیادہ متاثر ہونے والے شعبے زراعت اور بنیادی ڈھانچہ (انفرا اسٹرکچر) ہیں، جنہیں مجموعی معیشت کا ستون سمجھا جاتا ہے۔
رپورٹ میں کہا گیا ہے کہ پاکستان کو اپنی تاریخ کے شدید ترین مون سون سیلابوں میں سے ایک کا سامنا کرنا پڑا، جس سے انفرا اسٹرکچر، روزگار، اور بنیادی خدمات کو تباہ کن نقصان پہنچا۔ ابتدائی تخمینے کے مطابق نقصان 744 ارب روپے بتایا گیا تھا، تاہم بعد ازاں یہ تخمینہ بڑھ کر 822 ارب روپے تک جا پہنچا۔
رپورٹ کے مطابق سیلابوں سے مجموعی طور پر 2 لاکھ 29 ہزار 763 مکانات متاثر ہوئے، جن میں 59 ہزار 258 مکمل طور پر تباہ اور 1 لاکھ 70 ہزار 505 جزوی طور پر متاثر ہوئے۔جبکہ آفات کے نتیجے میں 1 ہزار 37 افراد جاں بحق جبکہ 1 ہزار 67 زخمی ہوئے۔
