عالمی منڈی میں سونے کی قیمت میں نمایاں اضافے کے بعد پاکستان میں بھی سونا تاریخ کی بلند ترین سطح پر پہنچ گیا۔ پیر کے روز ملکی صرافہ مارکیٹ میں فی تولہ سونا 5 ہزار 500 روپے مہنگا ہو کر 4 لاکھ 28 ہزار 200 روپے کا ہوگیا، جو ملکی تاریخ کی اب تک کی سب سے زیادہ قیمت ہے۔
آل پاکستان جیمز اینڈ جیولرز ایسوسی ایشن کے مطابق 10 گرام سونا 4 ہزار 715 روپے اضافے کے بعد 3 لاکھ 67 ہزار 112 روپے میں فروخت ہوا۔ ہفتے کے روز بھی فی تولہ قیمت میں 2 ہزار 100 روپے اضافہ ریکارڈ کیا گیا تھا، جس سے قیمت 4 لاکھ 22 ہزار 700 روپے تک جا پہنچی تھی۔
ایسوسی ایشن کے مطابق عالمی منڈی میں سونا 55 ڈالر اضافے کے بعد 4 ہزار 71 ڈالر فی اونس (20 ڈالر پریمیم کے ساتھ) تک جا پہنچا۔ اس کے ساتھ ہی چاندی کی قیمت بھی 147 روپے اضافے کے بعد 5 ہزار 247 روپے فی تولہ کی نئی بلندی پر پہنچ گئی۔
ماہرین کے مطابق عالمی سطح پر سونے کی قیمت میں یہ اضافہ امریکی فیڈرل ریزرو کی جانب سے شرح سود میں ممکنہ کمی اور امریکا۔چین تجارتی کشیدگی میں اضافے کے باعث دیکھنے میں آیا۔
رپورٹس کے مطابق اس وقت سپاٹ گولڈ 0.7 فیصد اضافے کے ساتھ 4 ہزار 44.29 ڈالر فی اونس پر ٹریڈ ہورہا ہے، جب کہ دن کے آغاز میں یہ 4 ہزار 59.30 ڈالر کی بلند ترین سطح کو چھو چکا ہے۔
دوسری جانب امریکی فیوچر گولڈ (دسمبر کنٹریکٹ) بھی 1.6 فیصد اضافے کے ساتھ 4 ہزار 62.50 ڈالر فی اونس تک جا پہنچا۔ ماہرین کے مطابق سرمایہ کاروں کی محفوظ سرمایہ کاری (Safe Haven) کی جانب واپسی نے سونا اور چاندی دونوں کی قیمتوں کو تاریخی بلندیوں تک پہنچا دیا ہے۔
.jpeg)
