جب ملالہ کو اسکے شوہر نے "سیکس بم" کہا تو اسکا کیا ردعمل تھا؟

 نوبیل انعام یافتہ ملالہ یوسفزئی نے اپنی آنے والی سوانح عمری “فائنڈنگ مائی وے (Finding My Way)” میں پہلی بار اپنے شوہر عصر ملک کے ساتھ تعلق اور محبت کی کہانی بیان کی ہے۔ یہ کتاب 21 اکتوبر کو شائع ہوگی۔

28 سالہ ملالہ، جو دنیا بھر میں لڑکیوں کی تعلیم کے لیے آواز بلند کرنے والی سب سے کم عمر نوبیل انعام یافتہ شخصیت ہیں، نے اپنی کتاب میں آکسفورڈ یونیورسٹی میں تعلیم کے دوران کی زندگی، ذاتی جذبات اور عصر ملک سے تعلق کے آغاز پر کھل کر بات کی ہے۔

برطانوی فیشن میگزین Vogue میں شائع ایک اقتباس کے مطابق، ملالہ نے بتایا کہ آکسفورڈ میں تعلیم کے دوران انہوں نے شہرت کے باعث اپنے تعلق کو خفیہ رکھا۔

انہوں نے لکھا کہ "عصر کی آمد نے آکسفورڈ میں میرے تیسرے سمسٹر کی اداسی کو خوشیوں میں بدل دیا، مگر ہمارا رشتہ کسی فلمی کہانی کی طرح آسان نہیں تھا، مجھے ہر وقت یہ خدشہ رہتا تھا کہ کہیں کوئی ہمیں دیکھ نہ لے۔"

ملالہ کے مطابق ایک روز وہ عصر کے ساتھ چہل قدمی کر رہی تھیں جب ایک خاتون نے انہیں پہچان کر تصویر لینے کی کوشش کی۔

"میں فوراً ایک جھاڑی کے پیچھے چھپ گئی، جس سے عصر اور سیکیورٹی ٹیم دونوں گھبرا گئے۔"

انہوں نے بتایا کہ ابتدا میں اپنے والدین سے رشتہ چھپانے کے لیے کئی تدبیریں کرنا پڑیں۔ ایک موقع پر وہ شلوار قمیض پہن کر گھر سے نکلیں تاکہ والدہ مطمئن رہیں، مگر ریستوران پہنچ کر کپڑے بدل کر جدید لباس اور ہیلز پہن لیں۔

ملالہ نے ایک دلچسپ واقعہ بیان کرتے ہوئے لکھا کہ "میں جب واپس میز پر آئی تو عصر مسکرانے لگا، اس نے میری کرسی کھینچی اور کان میں کہا: ‘یو آر اے سیکس بم!’ میں شرم کے مارے چہرہ نیپکن کے پیچھے چھپا لیا۔"

ملالہ نے بتایا کہ جب انہوں نے اپنے والد کو پہلی بار بتایا کہ وہ عصر کو پسند کرتی ہیں تو انہوں نے کہا:

"ڈیڈ، مجھے وہ اچھا لگتا ہے… رومانی طور پر۔ لیکن آپ امی کو ابھی مت بتائیں۔"

تاہم، ان کے والد نے فوراً والدہ کو اطلاع دے دی، جس پر ملالہ کی والدہ نے کہا:

“بالکل نہیں! کیا وہ پشتو بولتا ہے؟ اسے پشتون لڑکے سے شادی کرنی چاہیے!”

 

ملالہ نے مزید لکھا کہ ان کے والدین کو خدشہ تھا کہ یہ تعلق کسی سکینڈل میں تبدیل ہوسکتا ہے۔ تاہم، ملالہ نے کہا کہ وہ رشتہ ختم نہیں کرنا چاہتی تھیں، البتہ والدین کے ساتھ کشیدگی انہیں پریشان کرتی تھی۔

انہوں نے بتایا کہ آکسفورڈ کی تعلیم مکمل کرنے کے دوران انہوں نے عصر سے کہا کہ "کیا ہم اپنے جذبات کو کچھ وقت کے لیے روک سکتے ہیں؟" جس پر عصر نے جواب دیا:

"شاید جذبات ایسے نہیں رکتے، مگر تمہارے لیے میں کوشش کروں گا۔"

یاد رہے کہ ملالہ یوسفزئی اور عصر ملک نے 2021 میں برمنگھم (انگلینڈ) میں سادہ نکاح کیا تھا۔

ان کی نئی کتاب “فائنڈنگ مائی وے” Atria Books (Simon & Schuster) کے تحت 21 اکتوبر کو شائع ہوگی، جس میں ملالہ نے اپنی ذاتی، تعلیمی اور جذباتی زندگی کے اہم پہلوؤں کو پہلی بار کھل کر بیان کیا ہے۔

Share:

Facebook Email Linkedin