ہر سال 14 نومبر کو دنیا بھر میں عالمی یومِ ذیابیطس منایا جاتا ہے، جس کا مقصد اس مرض سے متعلق آگاہی پیدا کرنا، بروقت تشخیص کی اہمیت اجاگر کرنا اور بچاؤ کے طریقوں سے لوگوں کو روشناس کرانا ہے۔ پاکستان میں ذیابیطس کی بڑھتی ہوئی شرح تشویش ناک صورت اختیار کر چکی ہے۔ اب یہ مرض صرف بڑی عمر کے افراد تک محدود نہیں بلکہ نوجوان بھی اس کی زد میں آ رہے ہیں۔

بین الاقوامی ذیابیطس فیڈریشن کی 2025 کی رپورٹ کے مطابق پاکستان میں 2024 کے دوران 20 سے 79 سال کی عمر کے تقریباً 3 کروڑ 45 لاکھ افراد ذیابیطس کا شکار تھے، جبکہ بالغ آبادی میں اس مرض کی شرح 31.4 فیصد ریکارڈ کی گئی۔ یہ اعدادوشمار اس مسئلے کی سنگینی اور عوامی آگاہی کی ضرورت کو واضح کرتے ہیں۔

ذیابیطس، جسے عام زبان میں شوگر کہا جاتا ہے، ایسی بیماری ہے جس میں خون میں شکر کی مقدار معمول سے بڑھ جاتی ہے۔ اس کی بنیادی وجہ جسم میں انسولین کی کمی یا اس کا درست طور پر استعمال نہ ہونا ہے۔ انسولین لبلبے میں بننے والا ہارمون ہے جو خون میں موجود شکر کو جسم کے خلیوں تک پہنچانے میں مدد دیتا ہے۔

مردان کی معالج ڈاکٹر کائنات کے مطابق غیر صحت مند طرزِ زندگی، جسمانی سرگرمیوں کی کمی، غیر متوازن خوراک اور وزن میں اضافہ ذیابیطس کی اہم وجوہات میں شامل ہیں۔ اس کے علاوہ خاندانی تاریخ اور موروثی عوامل بھی اس بیماری کا خطرہ بڑھا سکتے ہیں۔ ان کا کہنا ہے کہ لوگوں کو اپنی صحت کے حوالے سے غفلت نہیں برتنی چاہیے اور خطرے کی علامات ظاہر ہونے پر طبی معائنہ کروانا چاہیے۔

ڈاکٹر کائنات کے مطابق بار بار پیاس لگنا، پیشاب کی زیادتی، غیر معمولی تھکاوٹ اور بلاوجہ وزن کم ہونا ذیابیطس کی ممکنہ علامات ہیں۔ تاہم بعض افراد میں ابتدائی مرحلے پر کوئی واضح علامت ظاہر نہیں ہوتی، اس لیے ضرورت کے مطابق خون میں شکر کی جانچ کروانا ضروری ہے۔

اگر ذیابیطس کو قابو میں نہ رکھا جائے تو وقت کے ساتھ گردے، آنکھیں، دل اور اعصاب متاثر ہو سکتے ہیں۔ بینائی میں کمی، ہاتھ پاؤں میں سن ہونا اور زخموں کا دیر سے ٹھیک ہونا بھی اس کی پیچیدگیوں میں شامل ہیں۔

اس بیماری کے خطرے کو کم کرنے کے لیے متوازن غذا، باقاعدہ جسمانی سرگرمی اور صحت مند معمولات اپنانا ضروری ہے۔ عالمی ادارۂ صحت کے مطابق بالغ افراد کو ہفتے میں کم از کم 150 منٹ معتدل جسمانی سرگرمی کرنی چاہیے۔ تازہ سبزیاں، مناسب مقدار میں پھل اور متوازن غذا استعمال کرنے کے ساتھ میٹھے مشروبات اور زیادہ چکنائی والی غذاؤں کا استعمال محدود کرنا بھی مفید ہے۔

یہ بات بھی اہم ہے کہ ہر قسم کی ذیابیطس سے بچاؤ ممکن نہیں، تاہم ٹائپ ٹو ذیابیطس کے خطرے کو صحت مند طرزِ زندگی کے ذریعے کم یا اس کے آغاز میں تاخیر کی جا سکتی ہے۔ جن افراد کو یہ مرض لاحق ہو چکا ہے، وہ ڈاکٹر کے مشورے، مناسب علاج اور باقاعدہ معائنے سے اسے قابو میں رکھ سکتے ہیں۔

عالمی یومِ ذیابیطس کا بنیادی پیغام یہی ہے کہ بیماری کی علامات کو نظرانداز کرنے کے بجائے بروقت تشخیص اور احتیاط کو ترجیح دی جائے، کیونکہ صحت مند طرزِ زندگی اور درست معلومات ہی ذیابیطس کے بڑھتے ہوئے خطرے سے نمٹنے میں اہم کردار ادا کر سکتی ہیں۔