خیبر پختونخوا میں رواں سال دہشتگردی کے واقعات سے متعلق سی پی او کی جانب سے جاری رپورٹ کے مطابق صوبے میں مجموعی طور پر 1,588 دہشتگردی کے واقعات پیش آئے، جن میں سیکیورٹی اہلکاروں سمیت 502 شہری شہید ہوئے۔

رپورٹ کے مطابق دہشتگردی کے واقعات میں 223 شہری شہید اور 570 زخمی ہوئے، جبکہ 137 پولیس اہلکار شہید اور 236 زخمی ہوئے۔ اسی طرح رواں سال قانون نافذ کرنے والے اداروں کے مزید 18 اہلکار بھی شہادت کا درجہ حاصل کر گئے۔ فیڈرل کانسٹیبلری کے 124 جوان شہید اور 244 زخمی ہوئے۔

سی پی او کے مطابق مختلف کارروائیوں کے دوران 348 دہشتگردوں کو ہلاک کیا گیا۔ دہشتگردی کے سب سے زیادہ 394 کیسز بنوں ریجن میں درج ہوئے، جہاں 41 پولیس اہلکار شہید اور 89 زخمی ہوئے، جبکہ 54 شہری شہید اور 125 زخمی ہوئے۔

ڈیرہ اسماعیل خان ریجن میں 152 مقدمات درج کئے گئے، جہاں کارروائیوں کے دوران 137 دہشتگرد مارے گئے۔ شمالی وزیرستان میں 181 کیسز رجسٹرڈ ہوئے، جن میں 38 شہری شہید اور 182 زخمی ہوئے، جبکہ جنوبی وزیرستان میں 103 واقعات رپورٹ ہوئے، جن میں 39 شہری شہید اور 86 زخمی ہوئے۔

سی پی او کا کہنا ہے کہ صوبے میں امن و امان کی صورتحال بہتر بنانے کے لیے سیکیورٹی اداروں کی کارروائیاں جاری ہیں۔