گزشتہ رات بنوں کے احمد زئی وزیر پولیس سٹیشن پر دہشتگردوں نے چاروں اطراف سے ہلکے اور بھاری ہتھیاروں سے حملہ کیا، تاہم پولیس جوانوں نے بھرپور مزاحمت کرتے ہوئے حملہ ناکام بنا دیا۔ ضلع بنوں میں حالیہ دنوں دہشتگردی کے واقعات میں اضافہ دیکھا جا رہا ہے، جس کے باعث مختلف علاقوں کے لوگ نقل مکانی پر مجبور ہیں۔
حملے کی اطلاع کے بعد تھانہ ڈومیل، تھانہ ٹاؤن کی نفری اور سیکیورٹی فورسز بھی فوری طور پر موقع پر پہنچیں اور مشترکہ کارروائی کرتے ہوئے دہشتگردوں کے خلاف شدید جوابی فائرنگ کی۔ پولیس کے مطابق جوابی کارروائی میں شرپسندوں کو بھاری جانی نقصان پہنچنے کی اطلاعات ہیں۔
واقعے میں پولیس کے پانچ اہلکار معمولی زخمی ہوئے جن میں سپاہی انسان، سپاہی انور، سپاہی عرفات، سپاہی قدرت اور سپاہی انور خان شامل ہیں۔ زخمی اہلکاروں کو فوری طبی امداد فراہم کر دی گئی ہے۔
پولیس سٹیشن کی عمارت کو بھی جزوی نقصان پہنچا ہے جبکہ جائے وقوعہ سے ہینڈ گرنیڈ، راکٹ گولا اور خون کے نشانات بھی ملے ہیں، جو دہشتگردوں کے زخمی یا مارے جانے کا اشارہ دیتے ہیں۔
ڈی آئی جی بنوں سجاد خان اور ڈی پی او یاسر آفریدی نے حملہ ناکام بنانے پر پولیس اہلکاروں کی جرات اور بہادری کو خراج تحسین پیش کیا۔ انہوں نے کہا کہ بنوں پولیس ہر محاذ پر امن دشمن عناصر کا ڈٹ کر مقابلہ جاری رکھے گی، دہشتگردی کی بزدلانہ کارروائیوں سے پولیس کے حوصلے پست نہیں ہو سکتے۔
.jpeg)
.jpeg)
.jpeg)
