خیبرپختونخوا کے بنوں ریجن کے مختلف علاقوں میں پولیس، سی ٹی ڈی اور سیکیورٹی فورسز نے مشترکہ آپریشنز کے دوران فتنۃ الخوارج کے 3 اہم کمانڈرز سمیت 17 دہشتگردوں کو ہلاک جبکہ درجنوں کو زخمی کر دیا۔ کارروائیوں میں بڑی مقدار میں اسلحہ اور بارودی مواد بھی برآمد ہوا۔
آئی جی پولیس خیبرپختونخوا ذوالفقار حمید کے مطابق شیری خیل اور پکہ پہاڑ خیل میں دہشتگردوں کی موجودگی کی اطلاع پر فورسز نے بھرپور آپریشن کیا، جس میں لکی پولیس، سی ٹی ڈی بنوں اور سیکیورٹی فورسز نے حصہ لیا۔ آپریشن کے دوران 10 دہشتگرد ہلاک، 5 زخمی اور ایک سہولت کار گرفتار کیا گیا۔
آئی جی نے بتایا کہ ہلاک ہونے والوں میں فتنۃ الخوارج کے 3 اہم کمانڈرز بھی شامل ہیں۔ سات دہشتگردوں کی لاشیں برآمد کرلی گئی ہیں جبکہ 3 لاشوں تک دشوار گزار پہاڑی علاقے کے باعث رسائی نہیں ہو سکی۔
دوسری جانب ایک اور 8 گھنٹے طویل کارروائی میں بنوں پولیس، سی ٹی ڈی اور فورسز نے 6 دہشتگردوں کو مار گرایا جبکہ متعدد زخمی ہوگئے۔
آئی جی خیبرپختونخوا ذوالفقار حمید نے کامیاب کارروائیوں پر پولیس اور فورسز کو مبارک باد دیتے ہوئے کہا کہ صوبے کی مٹی کو ہر فتنے سے پاک کیا جائے گا۔ ”دہشتگردوں کا ان کی خفیہ پناہ گاہوں تک پیچھا کریں گے، آخری دہشتگرد کے خاتمے تک آپریشن جاری رہے گا۔“
دوسری جانب پولیس نے بتایا کہ آبشار چوک میں گھی کے ڈبے میں نصب 10 کلو وزنی بم کو ناکارہ بنا دیا گیا، جس سے شہر ایک بڑے سانحے سے بچ گیا۔
ڈی آئی جی سجاد خان کے مطابق بم ڈسپوزل اسکواڈ نے بروقت کارروائی کرتے ہوئے بارودی مواد ناکارہ بنایا، ورنہ علاقے میں سنگین تباہی پھیل سکتی تھی۔
.jpg)
