پاکستان کسٹمز نے  کارروائی کے دوران سمگلنگ کی کوشش ناکام بناتے ہوئے مسافر بس سے 15.2 کلوگرام کرسٹل میتھ ایمفیٹامین (آئس) برآمد کر لی، جس کی مالیت تقریباً 91 کروڑ روپے سے زائد بتائی جا رہی ہے۔

ذرائع کے مطابق فیڈرل بورڈ آف ریونیو (ایف بی آر) نے بتایا کہ کسٹمز انفورسمنٹ ٹیم نے معمول کے چیک کے دوران آئی پی-جے سی پی امان میلہ، ڈیرہ اسماعیل خان پر ایک مسافر بس سے غیر ملکی ساختہ منشیات کی بڑی مقدار پکڑی۔

کسٹمز حکام کے مطابق منشیات بس میں نصب تین خاص طور پر تیار کردہ انورٹرز کے اندر چھپائی گئی تھیں۔ کارروائی کے دوران بس کے ڈرائیور اور کنڈکٹر کو موقع پر گرفتار کر لیا گیا اور ان کے خلاف مقدمہ درج کر دیا گیا ہے۔

حکام کے مطابق برآمد ہونے والی منشیات 15 پیکٹوں پر مشتمل تھیں جن کی مجموعی مالیت 91 کروڑ 2 لاکھ روپے سے زائد بنتی ہے۔

رپورٹ کے مطابق جب منشیات کو آئی پی-جے سی پی امان میلہ سے ریاستی گودام منتقل کیا جا رہا تھا تو قافلے پر ایک نامعلوم مسلح شخص نے حملہ کر دیا اور کسٹمز عملے پر اندھا دھند فائرنگ کی۔ تاہم کسٹمز ٹیم کی بروقت جوابی کارروائی سے اہلکار محفوظ رہے اور قبضے میں لی گئی منشیات بھی مکمل طور پر محفوظ رہیں۔