خیبرپختونخوا سے سینیٹ کی جنرل نشست پر ضمنی انتخاب کل صوبائی اسمبلی خیبرپختونخوا کی عمارت میں ہوگا۔ یہ نشست سید شبلی فراز کی نااہلی کے باعث خالی ہوئی تھی۔
الیکشن کمیشن کی جانب سے تمام تیاریاں مکمل کرلی گئی ہیں۔ پولنگ صبح 9 بجے سے شام 4 بجے تک جاری رہے گی۔ انتخاب میں تین امیدوار میدان میں ہیں جن میں تاج محمد آفریدی، خرم ذیشان اور عرفان سلیم شامل ہیں، جبکہ دو امیدوار عابد خان یوسفزئی اور نثار خان پہلے ہی ریٹائر ہوچکے ہیں۔
صوبائی الیکشن کمشنر خیبرپختونخوا سعید گل کو ریٹرننگ آفیسر مقرر کیا گیا ہے، جبکہ دیگر پولنگ افسران میں جوائنٹ صوبائی الیکشن کمشنر محمد فرید آفریدی، ڈائریکٹر الیکشنز محمد ندیم خان، ڈپٹی ڈائریکٹر ایڈمن ظہیر احمد، ڈپٹی ڈائریکٹر میڈیا کوآرڈینیشن سہیل احمد، ڈپٹی ڈائریکٹر الیکشنز فہد علی شاہ اور ڈپٹی ڈائریکٹر لاء محمد امجد شامل ہیں۔
پارٹی پوزیشن کے مطابق خیبرپختونخوا اسمبلی میں پی ٹی آئی کے 92 اور اپوزیشن کے 53 ارکان ہیں۔ تاہم اے این پی کے انتخابی عمل سے دستبرداری کے بعد اپوزیشن کے ارکان کی تعداد 49 رہ گئی ہے۔ اس صورتحال میں خرم ذیشان کو کامیابی کے لیے 71 ووٹ درکار ہیں، جبکہ اپوزیشن کے لیے پی ٹی آئی کے 22 ارکان کی حمایت حاصل کرنا تقریباً ناممکن دکھائی دیتا ہے۔
سیاسی مبصرین کے مطابق ضمنی انتخاب میں پی ٹی آئی کے امیدوار کی کامیابی کے امکانات خاصے روشن ہیں۔
