خادم خان آفریدی
وزیر اعلیٰ خیبرپختونخوا محمد سہیل آفریدی نے کہا ہے کہ قبائلی عوام نے ملک کے لیے بے شمار قربانیاں دی ہیں، اب وقت آ گیا ہے کہ ان کے ساتھ انضمام کے موقع پر کیے گئے وعدے پورے کیے جائیں۔ انہوں نے واضح اعلان کیا کہ صوبائی حکومت کسی نئے ملٹری آپریشن کی اجازت نہیں دے گی۔
باڑہ میں پی ٹی آئی کے زیر اہتمام گرینڈ امن جرگہ کا انعقاد کیا گیا، جس میں وزیر اعلیٰ محمد سہیل آفریدی مہمان خصوصی تھے۔ تقریب میں ایم این اے اقبال آفریدی، ایم پی اے عبدالغنی آفریدی، سینیٹر مرزا محمد آفریدی، سینیٹر پیر نور الحق قادری، قبائلی عمائدین، مشران اور ہزاروں افراد نے شرکت کی۔
وزیر اعلیٰ سہیل آفریدی نے اپنے خطاب میں کہا کہ وفاقی حکومت فوری طور پر قبائلی اضلاع کے 550 ارب روپے کے بقایاجات اور نیٹ ہائیڈرو پاور کے 2200 ارب روپے کے واجبات ادا کرے۔ انہوں نے کہا کہ “ہمیں خیرات نہیں بلکہ اپنا حق چاہیے۔”
ان کا کہنا تھا کہ خیبر کے بعد تمام قبائلی اضلاع میں امن جرگے منعقد کیے جائیں گے اور اس کے بعد لویہ جرگہ بلایا جائے گا تاکہ پائیدار امن و ترقی کے لیے مشترکہ حکمت عملی طے کی جا سکے۔
وزیر اعلیٰ نے کہا کہ خیبرپختونخوا کے عوام اور سیکیورٹی اداروں نے ملک کے لیے 80 ہزار جانوں کی قربانیاں دی ہیں۔ “ہم نے خون دے کر امن قائم کیا، مگر ایک بار پھر حالات خراب کرنے کی کوشش کی جا رہی ہے۔”
انہوں نے کہا کہ فیصلے بند کمروں میں نہیں بلکہ عوامی نمائندوں اور عمائدین کے مشورے سے کیے جائیں گے۔ جرگے کے شرکاء نے اس موقع پر "ساڈا حق آتے رکھ" کے نعرے لگائے۔
وزیر اعلیٰ سہیل آفریدی نے اعلان کیا کہ جب تک وہ منصب پر ہیں، قبائلی عوام کے حقوق اور ان کے مستقبل کے تحفظ کے لیے ہر فورم پر لڑیں گے، اور وفاقی حکومت کو قبائلی اضلاع کو ترقیاتی بجٹ میں ان کا جائز حصہ دینا ہوگا تاکہ احساسِ محرومی ختم اور امن مضبوط ہو۔
.jpeg)