خیبر پختونخوا میں ڈینگی کے کیسز میں مسلسل اضافہ جاری ہے، گزشتہ 24 گھنٹوں کے دوران مزید 38 نئے کیسز رپورٹ ہوئے ہیں۔ محکمہ صحت خیبر پختونخوا کی رپورٹ کے مطابق اس وقت صوبے میں ڈینگی کے فعال مریضوں کی تعداد 268 ہو گئی ہے۔
رپورٹ میں بتایا گیا کہ گزشتہ چوبیس گھنٹوں کے دوران ڈینگی سے متاثرہ 25 نئے مریضوں کو مختلف اسپتالوں میں داخل کیا گیا، جبکہ صوبے کے مختلف ہسپتالوں میں زیر علاج مریضوں کی تعداد 54 ہے۔
محکمہ صحت کے مطابق رواں سال اب تک ڈینگی کے مجموعی 3 ہزار 830 کیسز سامنے آ چکے ہیں، جن میں سے 1 ہزار 582 مریضوں کو اسپتال میں داخل کیا گیا۔
رپورٹ میں مزید کہا گیا کہ اب تک 3 ہزار 560 مریض صحت یاب ہو چکے ہیں جبکہ رواں سال ڈینگی کے باعث 2 افراد جاں بحق ہوئے ہیں۔
محکمہ صحت نے شہریوں سے اپیل کی ہے کہ گھروں اور اردگرد کے علاقوں میں پانی جمع نہ ہونے دیں اور ڈینگی سے بچاؤ کے لیے احتیاطی تدابیر پر عمل کریں۔
