افغانستان کی صورتحال پر غور کے لیے پاکستان، ایران، روس اور چین کے نمائندے آج ماسکو میں غیر معمولی اجلاس میں شریک ہوں گے۔
سفارتی ذرائع کے مطابق پاکستان کی نمائندگی نمائندۂ خصوصی برائے افغانستان محمد صادق کریں گے۔ اجلاس میں افغانستان کی حالیہ صورتحال، علاقائی سلامتی اور انسداد دہشت گردی پر تبادلہ خیال ہوگا۔
ذرائع کا کہنا ہے کہ اجلاس میں شریک ممالک افغانستان میں غیر ملکی فوجی اڈے کے قیام کی مخالفت کریں گے اور 1988ء کے پابندیوں کے نظام میں زمینی حقائق کے مطابق ایڈجسٹمنٹ پر زور دیں گے۔
اجلاس میں طالبان رہنماؤں کے سفری استثنیٰ پر دہرے معیار، افغانستان میں انسانی امداد میں اضافے، اور دہشتگرد گروہوں کے خلاف کارروائی پر بھی بات کی جائے گی۔ پاکستان اس موقع پر افغان سرزمین پر کالعدم تنظیموں کی محفوظ پناہ گاہوں، بھرتیوں، اسلحہ اور فنڈنگ کے خاتمے کا مطالبہ کرے گا۔
سفارتی ذرائع کے مطابق اجلاس میں بی ایل اے، ٹی ٹی پی اور جیش العدل کے نیٹ ورکس کے خاتمے، انسداد منشیات، سمگلنگ، علاقائی رابطے اور ترقیاتی منصوبوں پر بھی زور دیا جائے گا۔ اس کے علاوہ خواتین و بچوں کے حقوق اور لڑکیوں کی تعلیم و روزگار کی بحالی پر بھی بات ہوگی۔
ذرائع کا کہنا ہے کہ چاروں ممالک افغانستان میں جامع اور وسیع البنیاد حکومت کے قیام، افغان مہاجرین کی باعزت واپسی اور منجمد اثاثوں کی بحالی پر بھی زور دیں گے۔ اجلاس میں افغانستان کے ساتھ سفارتی تعلقات میں مزید بہتری کے امکانات پر بھی گفتگو ہوگی۔
