معاون خصوصی برائے اطلاعات بیرسٹر ڈاکٹر سیف کے مطابق موجودہ حکومت "صحت کارڈ پلس" منصوبے کے تحت ڈیڑھ سالہ دور میں 16 لاکھ 70 ہزار سے زائد مریضوں کو مفت علاج فراہم کر چکا ہے۔
انہوں نے بتایا کہ عوام کو صحت کی سہولیات کی فراہمی پر اب تک 57 ارب روپے خرچ کئے گئے ہیں جبکہ 276 مریضوں کو گردے اور جگر کی پیوندکاری، بون میرو ٹرانسپلانٹ اور کاکلئیر امپلانٹ جیسی سہولیات فراہم کی گئی ہیں۔
ڈاکٹر سیف کے مطابق صحت کارڈ پلس کے تحت خیبر پختونخوا کے 158 اور ملک بھر کے 700 اسپتالوں میں مفت علاج کی سہولت دستیاب ہے۔ منصوبے کے تحت گردے، جگر کی پیوندکاری سمیت مہنگے امراض کا علاج بھی مفت فراہم کیا جا رہا ہے۔
انہوں نے مزید کہا کہ ژوندون کارڈ کے ذریعے او پی ڈی مریضوں کو مفت ادویات کی فراہمی کا آغاز کیا جا چکا ہے جس کی شروعات ضلع مردان سے کی گئی ہے اور جلد یہ سہولت صوبے کے دیگر اضلاع تک بڑھائی جائے گی۔
بیرسٹر ڈاکٹر سیف نے کہا کہ صحت کارڈ پلس حقیقی معنوں میں عوامی فلاح و بہبود کا منصوبہ ہے، جس کے ذریعے لاکھوں خاندان معیاری اور باوقار علاج کی سہولت سے مستفید ہو رہے ہیں۔ ان کے بقول خیبر پختونخوا حکومت عوام کو معیاری صحت کی سہولیات دینے اور خدمت کا نیا معیار قائم کرنے کے لیے پرعزم ہے۔
.jpeg)
