آئی سی سی ورلڈ ٹیسٹ چیمپئن شپ کے تحت جنوبی افریقا کے خلاف دو ٹیسٹ میچز کی سیریز کے لیے پاکستان کرکٹ بورڈ (پی سی بی) نے 18 رکنی قومی اسکواڈ کا اعلان کردیا ہے۔
پی سی بی کے مطابق قومی ٹیم کی قیادت شان مسعود کریں گے، جب کہ تین نئے کھلاڑی آصف آفریدی، فیصل اکرم اور روہیل نذیر کو پہلی مرتبہ اسکواڈ میں شامل کیا گیا ہے۔
اعلان کردہ اسکواڈ میں عامر جمال، عبداللہ شفیق، ابرار احمد، بابراعظم، حسن علی، امام الحق، کامران غلام، خرم شہزاد، محمد رضوان (وکٹ کیپر)، نعمان علی، ساجد خان، سلمان علی آغا، سعود شکیل اور شاہین شاہ آفریدی بھی شامل ہیں۔
پاکستان اور جنوبی افریقا کے درمیان پہلا ٹیسٹ میچ 12 سے 16 اکتوبر تک قذافی سٹیڈیم لاہور میں کھیلا جائے گا، جب کہ دوسرا ٹیسٹ 20 سے 24 اکتوبر تک راولپنڈی کرکٹ سٹیڈیم میں شیڈول ہے۔
ٹیسٹ سیریز کے بعد دونوں ٹیموں کے درمیان تین ٹی ٹوئنٹی اور تین ون ڈے میچز بھی کھیلے جائیں گے جو 28 اکتوبر سے 8 نومبر تک ہونگے۔ ان میچز کے لیے وائٹ بال سکواڈ کا اعلان بعد میں کیا جائے گا۔
پی سی بی کے مطابق سیریز سے قبل قومی کھلاڑیوں کا تربیتی کیمپ آج سے ہیڈ کوچ اظہر محمود اور نیشنل کرکٹ اکیڈمی (این سی اے) کے کوچز کی نگرانی میں شروع ہوگیا ہے، جو 8 اکتوبر تک جاری رہے گا۔ ایشیا کپ کھیلنے والے کھلاڑی 4 اکتوبر کو سکواڈ کو جوائن کریں گے۔
.jpeg)
