شمالی وزیرستان پولیس نے کارروائی کرتے ہوئے جبری شادی (سوارہ/وانی) کے تحت دو کم سن بچیوں کو افغانستان منتقل کرنے کی کوشش ناکام بنا دی۔ کارروائی ضلعی پولیس سربراہ وقار احمد (پی ایس پی) کی ہدایت پر کی گئی۔
تفصیلات کے مطابق دیوگر سیدگی، تحصیل غلام خان کی رہائشی 12 اور 14 سالہ بچیوں کو افغان شہری کے ذریعے طورخم بارڈر منتقل کرنے کا منصوبہ بنایا گیا تھا۔ پولیس نے اطلاع ملنے پر فوری کارروائی کی اور دونوں بچیوں کو بازیاب کرا لیا۔
پولیس کے مطابق تقریباً 15 سال قبل بچیوں کے والد (مرحوم) نے افغانستان کے علاقے تانائی میں ایک خاتون سے شادی کی تھی جس پر دیرینہ تنازع پیدا ہوا۔ بعدازاں مقامی جرگے نے تنازع ختم کرنے کے لیے بچیوں کو افغانستان میں شادی کے لیے دینے کا فیصلہ کیا تھا جسے اُس وقت اہلِ خانہ نے مجبوری کے تحت قبول کر لیا تھا۔ تحقیقات میں واضح ہوا کہ متاثرہ بچیاں والد کی پہلی شادی سے ہیں۔
پولیس نے مقدمہ درج کر کے مرکزی ملزم کو گرفتار کر لیا ہے جبکہ ایس ایچ او غلام خان رقیب خان اور تفتیشی ٹیم نے مزید تفتیش شروع کر دی ہے۔
ڈی پی او وقار احمد (پی ایس پی) نے کہا کہ بچوں اور خواتین کے تحفظ کو یقینی بنایا جائے گا اور غیر قانونی رسومات کے خلاف قانون کے مطابق سخت کارروائی جاری رکھی جائے گی۔
.jpeg)
