وزیر اعلیٰ خیبر پختونخوا علی امین گنڈاپور نے وادی تیراہ کے واقعے میں شہید ہونے والے شہریوں کے لواحقین کے لیے فی کس ایک ایک کروڑ روپے مالی امداد کا اعلان کیا ہے۔
تیراہ ضلع خیبر کے ایک وفد نے وزیر اعلیٰ سے ملاقات کی جس میں ایم این اے اقبال آفریدی، چیف سیکرٹری، ایڈیشنل چیف سیکرٹری داخلہ، کمشنر پشاور اور دیگر متعلقہ حکام بھی موجود تھے۔ ملاقات میں امن و امان کی مجموعی صورتحال اور ناخوشگوار واقعے کے تناظر میں لائحہ عمل پر تفصیلی غور کیا گیا۔
وزیر اعلیٰ نے واقعے پر گہرے دکھ اور افسوس کا اظہار کرتے ہوئے شہداء کے درجات کی بلندی کے لیے فاتحہ خوانی بھی کی۔ ان کا کہنا تھا کہ دہشت گردوں کے خلاف کارروائیوں کے نتیجے میں عام شہریوں کی شہادت ناقابل قبول اور انتہائی افسوسناک ہے۔
ملاقات میں فیصلہ کیا گیا کہ ایسے ناخوشگوار واقعات کی روک تھام کے لیے علاقے کے عوامی نمائندوں، سیاسی قائدین اور مشران پر مشتمل ایک جرگہ اعلیٰ عسکری حکام سے ملاقات کرے گا۔ اس ملاقات میں امن و امان کے قیام کے لیے آئندہ کا لائحہ عمل طے کیا جائے گا۔
وزیر اعلیٰ نے کہا کہ باجوڑ کی طرز پر تیراہ میں بھی امن و امان کے قیام کے لیے حکمت عملی اپنائی جائے گی، جبکہ علاقے میں امن کی بحالی کے لیے عوام کا اعتماد حاصل کرنا نہایت ضروری ہے۔
