محکمہ پبلک ہیلتھ انجینئرنگ کی دستاویز کے مطابق خیبرپختونخوا میں حالیہ سیلاب سے 389 واٹر سپلائی سکیمیں متاثر ہوئی ہیں، جن میں 375 جزوی جبکہ 14 مکمل طور پر تباہ ہوگئی ہیں۔
رپورٹ کے مطابق متاثرہ سکیموں کی بحالی پر 91 کروڑ 90 لاکھ روپے سے زائد لاگت کا تخمینہ لگایا گیا ہے۔ ان سکیموں کی تباہی کے باعث مجموعی طور پر 9 لاکھ 88 ہزار سے زائد افراد پانی کی سہولت سے محروم ہوگئے ہیں۔
دستاویز میں بتایا گیا کہ ضلع مانسہرہ میں سب سے زیادہ 73 سکیمیں متاثر ہوئیں، جن کی بحالی پر 13 کروڑ روپے سے زائد لاگت آئے گی۔ بونیر میں 38 سکیمیں متاثر ہوئیں، جن کے لیے 14 کروڑ 20 لاکھ روپے سے زائد کی لاگت درکار ہوگی۔
اسی طرح سوات میں 60 واٹر سپلائی اسکیمیں متاثر ہوئیں جن میں سے 17 بحالی کے قابل نہیں رہیں۔ ایبٹ آباد میں 37 اسکیمیں متاثر ہوئیں جن میں 11 مکمل طور پر ناکارہ قرار دی گئی ہیں۔
