بیرسٹر گوہر علی خان نے کہا ہے کہ آج عمر ایوب، شبلی فراز اور عبداللطیف کے کیسز کی سماعت ہوئی جن میں الیکشن کمیشن نے غیر قانونی طور پر نااہل قرار دیا۔ انہوں نے عدالت سے استدعا کی کہ ان مقدمات کی کل سماعت کی جائے اور انصاف ہوتا ہوا نظر آنا چاہیے۔
پشاور میں میڈیا سے گفتگو کرتے ہوئے بیرسٹر گوہر نے بتایا کہ پاکستان تحریک انصاف کی پارلیمانی پارٹی کا اجلاس آج سہ پہر تین بجے خیبر پختونخوا ہاؤس میں ہوگا۔ جس میں امن و امان، افغانستان کی صورتحال اور حالیہ سیلاب سے متعلق امور پر بریفنگ دی جائے گی۔
انہوں نے کہا کہ اسلام آباد ہائیکورٹ کے جسٹس طارق جہانگیری کے ساتھ پیش آنے والا واقعہ افسوسناک ہے، کسی بھی جج کو جوڈیشل کام سے روکا نہیں جا سکتا۔ عوام کا پہلے ہی عدلیہ پر اعتماد کمزور ہو چکا ہے، اس لیے سپریم کورٹ کو فوری ایکشن لینا ہوگا۔
بیرسٹر گوہر نے مزید کہا کہ بانی تحریک انصاف کے کریمنل کیسز کو جلد از جلد سنا جانا چاہیے۔ چیف جسٹس سے درخواست ہے کہ ہمارے زیر التواء مقدمات پر قانون کے مطابق کارروائی کی جائے۔ ان کا کہنا تھا کہ اگر عدلیہ ماتحت عدالتوں پر نظر رکھتی تو ہمارے تین رہنماؤں کو سو سال کی سزا نہ سنائی جاتی۔
انہوں نے کہا کہ اب سزاؤں کا "اتوار بازار" ختم ہونا چاہیے۔ نفرتوں کے ذریعے حکومت کرنے سے پاکستان کو نقصان پہنچے گا۔
