خیبرپختونخوا حکومت نے اسلام آباد کے قریب مکھنیال، ضلع ہری پور میں نیا کے پی ہاؤس تعمیر کرنے کا باضابطہ فیصلہ کر لیا ہے۔ اس حوالے سے جاری اعلامیے کے مطابق منصوبے کو سالانہ ترقیاتی پروگرام میں شامل کر لیا گیا ہے۔ (ADP 2025-26)
اعلامیے کے مطابق نیا کے پی ہاؤس اسلام آباد سے 30 کلومیٹر کی مسافت پر واقع ہوگا۔ منصوبے کی مجموعی لاگت 500 ملین روپے مقرر کی گئی ہے، جس میں سے ابتدائی طور پر 250 ملین روپے رواں مالی سال کے لیے مختص کر دیے گئے ہیں۔
صوبائی حکومت نے ڈپٹی کمشنر ہری پور کو سرکاری زمین کی نشاندہی کی ذمہ داری سونپی ہے جبکہ چیف انجینئر، سیکرٹری، کمشنر ہزارہ ڈویژن اور دیگر متعلقہ محکموں کو بھی احکامات جاری کئے گئے ہیں۔
حکومتی اعلامیے کے مطابق منصوبہ اس وقت زمین کی نشاندہی اور کاغذی کارروائی کے مرحلے میں ہے۔ منصوبے کی تکمیل کے لیے حتمی ڈیزائن اور ٹھیکہ کمپنی کے تعین کے بعد عملی کام کا آغاز کیا جائے گا۔
