وزیراعلیٰ خیبرپختونخوا علی امین گنڈاپور کی ہدایات پر صوبے میں آٹے کے بحران پر قابو پانے کے لیے ہنگامی اقدامات جاری ہیں۔ وزیراعلیٰ کے ترجمان فراز مغل کے مطابق پنجاب کی پابندیوں اور ہولڈنگ کے باعث خیبرپختونخوا میں آٹے کے نرخ مزید بڑھ گئے ہیں۔
ترجمان نے بتایا کہ صوبے کی یومیہ ضرورت 14 ہزار 500 میٹرک ٹن ہے جبکہ اس وقت صرف 5.1 فیصد ذخائر دستیاب ہیں۔ ان کا کہنا تھا کہ ملک بھر میں گندم کی قیمتوں میں 68 فیصد اضافہ ریکارڈ ہوا ہے، جس میں خیبرپختونخوا سب سے زیادہ متاثر ہوا ہے۔
فراز مغل نے کہا کہ صوبائی حکومت نے وفاق سے مطالبہ کیا ہے کہ پاسکو 3900 روپے فی من کے حساب سے گندم فراہم کرے تاکہ عوام کو ریلیف دی جا سکے۔ وزیراعلیٰ نے واضح کیا ہے کہ عوام کو ریلیف دینا اولین ترجیح ہے اور اس کے لیے ہر ممکن اقدام کیا جا رہا ہے۔
