.png)
وزیر اطلاعات خیبرپختونخوا بیرسٹر ڈاکٹر محمد علی سیف نے کہا ہے کہ پنجاب کی عوام کو سیلاب کے باعث سر چھپانے کی جگہ نہیں مل رہی جبکہ مریم نواز کشتی رانی میں مصروف ہیں۔ ان کا کہنا تھا کہ لائف جیکٹ پہن کر کشتی میں چکر کاٹنے سے عوام کے دکھوں کا مداوا نہیں ہوسکتا، ضرورت اس بات کی ہے کہ عوام کے ساتھ عملی اقدامات کئے جائیں۔
انہوں نے کہا کہ عوام اپنے پیاروں، گھروں، مال مویشیوں اور فصلوں سے محروم ہوچکے ہیں، ایسے وقت میں مریم نواز کو اپنے چچا کی طرح "ڈرامہ بازی" سے باز آنا چاہیے۔ ڈاکٹر سیف کا کہنا تھا کہ یہ ٹک ٹاک فالورز بڑھانے کا وقت نہیں بلکہ متاثرہ عوام کے لیے سنجیدہ اقدامات اٹھانے کا وقت ہے۔
بیرسٹر ڈاکٹر سیف نے وزیراعلیٰ خیبرپختونخوا علی امین گنڈاپور کی تعریف کرتے ہوئے کہا کہ انہوں نے سیلاب کے دوران ریسکیو آپریشن کی خود نگرانی کی اور اب ریلیف و بحالی کے عمل کی براہ راست نگرانی بھی کر رہے ہیں۔ ان کے مطابق علی امین گنڈاپور نے سیلاب کے شہداء کے لیے پیکج کو ڈبل کیا اور لواحقین کو چیکس فراہم کیے، جبکہ زخمیوں اور متاثرہ گھروں کے معاوضے بھی دیے جارہے ہیں۔
انہوں نے کہا کہ خیبرپختونخوا حکومت پنجاب کے سیلاب زدگان کی مدد کے لیے بھی تیار ہے تاکہ مشکل کی اس گھڑی میں عوام کو سہارا فراہم کیا جاسکے۔
.jpg)
