طورخم بارڈر:دورانِ ڈیوٹی مسافروں کی ریکارڈنگ کرنے پر ایف آئی اے اہلکار معطل

طورخم بارڈر پر ایف آئی اے اہلکار کی جانب سے دورانِ ڈیوٹی مسافروں کی ریکارڈنگ اور فرائض منصبی میں غفلت برتنے کا واقعہ سامنے آیا ہے، جس کی ویڈیو سوشل میڈیا پر وائرل ہوگئی۔ 

ڈائریکٹر جنرل ایف آئی اے نے واقعے کا فوری نوٹس لیتے ہوئے ڈائریکٹر ایف آئی اے پشاور زون سے رپورٹ طلب کر لی ہے۔

ترجمان ایف آئی اے کے مطابق واقعے میں ملوث اہلکار احتشام الحق کو فوری طور پر معطل کر کے اس کے خلاف محکمانہ انکوائری شروع کر دی گئی ہے۔ معطل اہلکار طورخم امیگریشن چیک پوسٹ پر تعینات تھا۔

ایف آئی اے ترجمان کا کہنا ہے کہ ادارہ مسافروں کو باوقار، معیاری اور جدید امیگریشن سہولیات فراہم کرنے کے لیے پرعزم ہے۔ کسی بھی اہلکار کی جانب سے اختیارات کے ناجائز استعمال یا بدسلوکی برداشت نہیں کی جائے گی اور قواعد و ضوابط کی خلاف ورزی پر بلا امتیاز کارروائی عمل میں لائی جائے گی۔