ضلعی انتظامیہ نے اعلان کیا ہے کہ 28 اگست 2025 کو جنوبی وزیرستان اپر اور لوئر کے مختلف علاقوں میں صبح 6 بجے سے شام 7 بجے تک کرفیو نافذ رہے گا۔ اس دوران ہر قسم کی نقل و حرکت پر پابندی ہوگی اور تمام بازار و مارکیٹس بند رہیں گی۔
نوٹیفکیشن کے مطابق کرفیو کے دوران تحصیل برمل اور شکئی میں داخلہ سختی سے ممنوع ہوگا۔ متاثرہ راستوں میں وانا–تیارزہ گیٹ، کرب کوٹ، تنائی، عزیز آباد چوک تا درگئی پل اور شکئی–انزر چینہ تا وانا شامل ہیں۔
جنوبی وزیرستان اپر میں بھی کرفیو کے دوران کئی راستوں پر داخلہ بند رہے گا جن میں سپینکئی رغزئی تا نظر خیل، آسمان منزہ–کانیگرم، شیرونگی، سپین جماعت تا توروام، درگئی پل، مدی جان، شین ورسک، مولا خان سرائے تا چگملائی اور سرویکئ–مولا خان سرائے تا بروند شامل ہیں۔
انتظامیہ نے واضح کیا ہے کہ ایمرجنسی کی صورت میں پولیس یا سیکیورٹی فورسز کی اجازت اور شناختی کارڈ و ضروری کاغذات جمع کروا کر سفر ممکن ہوگا۔ ساتھ ہی یہ ہدایت بھی جاری کی گئی ہے کہ سیکیورٹی فورسز کی گاڑی دیکھتے ہی اپنی گاڑی کو 100 میٹر فاصلے پر سڑک سے نیچے اتارنا لازمی ہوگا۔
ڈیرہ اسماعیل خان اور ٹانک سے جنوبی وزیرستان اپر کا سفر کرنے والے شہریوں سے کہا گیا ہے کہ وہ کرفیو کے دوران غیر ضروری سفر سے گریز کریں۔ انتظامیہ کے مطابق یہ اقدامات امن و امان کی بحالی اور سیکیورٹی کی بہتری کے لیے ناگزیر ہیں۔
