خیبرپختونخوا میں حالیہ بارشوں اور سیلاب سے ہونے والے نقصانات کی ابتدائی رپورٹ تیار کرلی گئی ہے۔ رپورٹ کے مطابق صوبے میں 20 ارب روپے سے زیادہ کا مالی نقصان ہوا ہے۔
اعداد و شمار کے مطابق صوبے کے 20 محکموں کی مجموعی طور پر 603 سرکاری املاک متاثر ہوئیں۔ ضلع بٹگرام میں سب سے زیادہ 214 املاک تباہ ہوئیں جبکہ سوات میں 97، باجوڑ میں 65 اور مانسہرہ میں 58 سرکاری عمارتوں کو نقصان پہنچا۔
رپورٹ میں کہا گیا ہے کہ سیلاب سے 37 سرکاری تعلیمی ادارے، 83 سڑکیں اور 10 پل مکمل طور پر تباہ ہوگئے۔ اسی طرح 226 ایریگیشن چینلز اور 68 واٹر سپلائی اسکیموں کو بھی شدید نقصان پہنچا۔
مالی نقصانات کے حوالے سے رپورٹ میں بتایا گیا ہے کہ محکمہ ایریگیشن کو 10,328 ملین روپے، سی اینڈ ڈبلیو کو 3,438 ملین روپے، محکمہ تعلیم کو 1,449 ملین روپے جبکہ پبلک ہیلتھ انجینئرنگ کو 217 ملین روپے کا نقصان اٹھانا پڑا۔
ذرائع کے مطابق یہ ابتدائی رپورٹ وزیراعلیٰ خیبرپختونخوا علی امین گنڈاپور کو ارسال کردی گئی ہے۔
.jpeg)
