پروونشل ڈیزاسٹر مینجمنٹ اتھارٹی (پی ڈی ایم اے) نے صوبے میں حالیہ بارشوں اور فلش فلڈ سے ہونے والے جانی و مالی نقصانات کی رپورٹ جاری کر دی ہے۔
ترجمان پی ڈی ایم اے کے مطابق مختلف حادثات میں اب تک 377 افراد جاں بحق اور 182 زخمی ہوئے ہیں۔ جاں بحق افراد میں 294 مرد، 50 خواتین اور 33 بچے شامل ہیں، جبکہ زخمیوں میں 145 مرد، 27 خواتین اور 10 بچے شامل ہیں۔
پی ڈی ایم اے کی رپورٹ کے مطابق بارشوں اور سیلاب سے 1377 مکانات کو نقصان پہنچا، جن میں 1022 جزوی طور پر اور 355 مکمل طور پر منہدم ہوئے۔
سیلاب سے سب سے زیادہ متاثرہ ضلع بونیر رہا جہاں 228 افراد زندگی کی بازی ہار گئے۔ دیگر متاثرہ اضلاع میں سوات، باجوڑ، مانسہرہ، شانگلہ، دیر لوئر، بٹگرام اور صوابی شامل ہیں۔
ترجمان کے مطابق ضلعی انتظامیہ کو امدادی سرگرمیاں تیز کرنے اور متاثرین کو فوری معاونت فراہم کرنے کی ہدایت جاری کر دی گئی ہے۔
پی ڈی ایم اے نے بتایا کہ ایمرجنسی آپریشن سنٹر مکمل طور پر فعال ہے اور عوام کسی بھی ناخوشگوار واقعے یا موسمی صورتحال سے متعلق معلومات کے لیے ہیلپ لائن 1700 پر رابطہ کر سکتے ہیں۔
.jpeg)
