خیبر پختونخوا کے سیلاب سے متاثرہ اضلاع شانگلہ اور بونیر میں پاک فوج کے انجینئرز کور کی امدادی کارروائیاں تیز کر دی گئی ہیں۔
آئی ایس پی آر کے مطابق پیر بابا بائی پاس ہر قسم کی ٹریفک کے لیے کھول دیا گیا ہے جبکہ پیر بابا بازار میں عوام کی سہولت کے لیے ملبہ ہٹانے کا عمل رات بھر جاری رہا۔
بیان میں کہا گیا ہے کہ گاؤں گوکند جانے والی سڑک کو تین مقامات سے لینڈ سلائیڈنگ ہٹا کر کھول دیا گیا جبکہ آلوچ پران کی سڑک کو بھی بھاری مشینری کے ذریعے کلیئر کر دیا گیا ہے۔
پاک فوج کی اربن سرچ اینڈ ریسکیو ٹیمیں بھی بھاری مشینری کے ساتھ بیشونی اور قادر نگر میں مسلسل سرچ آپریشن کر رہی ہیں۔ اب تک بیشونی کے قریب نالے سے پانچ افراد کی لاشیں برآمد کی جا چکی ہیں۔
آئی ایس پی آر کا کہنا ہے کہ ریسکیو اور ریلیف آپریشن متاثرہ علاقوں کی مکمل بحالی تک جاری رہے گا۔
.jpeg)
