پروونشل ڈیزاسٹر منیجمنٹ اتھارٹی (پی ڈی ایم اے) نے حالیہ بارشوں اور فلش فلڈ کے باعث ہونے والے جانی و مالی نقصانات کی ابتدائی رپورٹ جاری کر دی ہے۔
ترجمان پی ڈی ایم اے کے مطابق گزشتہ 48 گھنٹوں کے دوران مختلف حادثات میں 307افراد جاں بحق جبکہ 23 زخمی ہوئے۔ جاں بحق افراد میں 279 مرد، 15 خواتین اور 13 بچے شامل ہیں، جبکہ زخمیوں میں 17 مرد، 4 خواتین اور 2 بچے شامل ہے۔
ابتدائی رپورٹ کے مطابق بارشوں اور فلش فلڈ کے باعث 74 مکانات کو نقصان پہنچا، جن میں 63 جزوی اور 11 مکمل طور پر منہدم ہوئے۔ یہ حادثات صوبے کے مختلف اضلاع سوات، بونیر، باجوڑ، تورغر، مانسہرہ، شانگلہ اور بٹگرام میں پیش آئے، جن میں سب سے زیادہ متاثرہ اضلاع باجوڑ اور بٹگرام ہیں۔
پی ڈی ایم اے کے مطابق شدید بارشوں کا موجودہ سلسلہ 21 اگست تک وقفے وقفے سے جاری رہنے کا امکان ہے۔
وزیراعلیٰ خیبرپختونخوا کی ہدایت پر متاثرہ اضلاع کے لیے مجموعی طور پر 50 کروڑ روپے کے امدادی فنڈز جاری کئے گئے۔
ان میں ضلع بونیر کے لیے 15 کروڑ، باجوڑ، بٹگرام اور مانسہرہ کے لیے 10، 10 کروڑ جبکہ سوات کے لیے 5 کروڑ روپے شامل ہیں۔
پی ڈی ایم اے نے بتایا کہ امدادی ٹیمیں ضلعی انتظامیہ کے ساتھ مسلسل رابطے میں ہیں اور متاثرین کو فوری ریلیف فراہم کرنے کے لیے سرگرم عمل ہیں۔ سیاحتی مقامات پر بند سڑکوں اور رابطہ شاہراوں کی بحالی کے لیے بھی تمام وسائل بروئے کار لانے کی ہدایت کی گئی ہے۔
مزید برآں، پی ڈی ایم اے نے سیاحوں کو موسمی صورتحال سے باخبر رہنے اور احتیاطی تدابیر اختیار کرنے کی ہدایت دی ہے۔ ترجمان کے مطابق ایمرجنسی آپریشن سنٹر مکمل طور پر فعال ہے اور عوام کسی بھی ناخوشگوار واقعے یا معلومات کے لیے ہیلپ لائن 1700 پر رابطہ کر سکتے ہیں۔
.jpeg)
